Ariana News сайти фотосурати
Афғонларнинг Ariana авиакомпанияси Қобул шаҳридан халқаро йўналишлар бўйича парвозларини тиклади. 8 ноябрь куни Ariana самолёти Дубайга (Бирлашган Араб Амирликлари) йўл олди, деб хабар беради Ariana News телеканали. Бу «Толибон»* радикал ҳаракати ҳукумат тепасига келгандан сўнг амалга оширилган илк халқаро парвоздир.
Аниқ бўлишича, авиакомпания ҳар куни Қобул ва Дубай ўртасида авиапарвозларни амалга оширади. Чипта нархи бир томонга $550 туради.
Компания вакилининг сўзларига кўра, биринчи рейс чипталарига талабгорлар жуда кўп бўлган.
Ҳозирча Дубай Ariana томонидан таклиф этилаётган ягона халқаро рейсдир.
Толиблар ҳукуматни эгаллаганидан сўнг хориж авиакомпаниялари томонидан айрим чартер рейслар уюштирилган, лекин ҳанузгача мунтазам тижорат рейслари тўхтатилган.
Октябрь ойи ўрталарида Pakistan International Airlines (PIA) авиакомпаниянинг Қобулдан Покистонга бўлган рейслари тўхтатилди. PIA вакилларининг таъкидлашича, бунга амалдаги Афғонистон ҳукуматининг «қўпол аралашуви» сабаб бўлган.
*«Толибон» ҳаракати РФ ва кўпгина мамлакатларда террорчи ташкилот деб тан олинган ва тақиқланган (Россия қонунчилиги талаби бўйича изоҳлаб ўтамиз).
