Қобулда Наврўз шарафига безатилган масжид.TOLOnews сюжетидан кадр
Афғонистонда ҳокимиятни қўлга киритган радикал «Толибон* ҳаракати Наврўз байрамини расман нишонламасликка қарор қилди, айни пайтда мамлакат аҳолисига байрамни нишонлаш тақиқланмаган, деб хабар беради TOLOnews телеканали.
Толиблар ҳокимиятни қўлга киритгунга қадар Наврўз Афғонистонда расмий байрам эди. Одатда мамлакатда уч кун — 21 мартдан 24 мартгача дам олиш куни деб эълон қилинган.
Журналист Башир Аҳмад Косонийнинг (Bashir Ahmad Qasani) Twitter саҳифасида ёзишича, «Толибон» барча давлат хизматчиларига бугун ишга чиқишни буюрган.
«Толибон» вакиллари Наврўз мусулмонларнинг байрами эмаслиги, у шариат меъёрларига тўғри келмаслиги боис уни расман нишонламасликларини айтишган.
Кобулда Наврўз байрамини нишонлаш учун маҳаллий аҳоли шаҳарнинг ғарбий қисмидаги Карта-э-Саҳи ҳудудига йиғилди. Гувоҳларнинг сўзларига кўра, йиғилганлар сони кўп бўлса-да, бу аввалги йиллардаги байрамга келган пойтахтликларнинг кўплигидан бир неча баравар кам эди.
Афғонистонга қўшни давлатларда Наврўз байрами муносабати билан бугун дам олиш куни. Масалан, Эронда байрам муносабати билан дам олиш кунлари икки ҳафта, Тожикистонда уч кун давом этади (бу икки давлат тил ва маданий жиҳатдан Афғонистонга яқин ҳисобланади).
*«Толибон» ҳаракати РФ ва кўпгина давлатларда террорчи ташкилот деб тан олинган ва тақиқланган (Россия қонунчилиги талаби бўйича изоҳлаб ўтамиз).
