Мирзиёев ва Жапаров Давлат чегарасини делимитация қилишга доир шартномани ратификация қилдилар

Ўзбекистон президенти матбуот хизмати фотосурати

Ўзбекистон ва Қирғизистон умумий давлат чегарасини делимитация қилиш жараёнини расман якунлади. 27 январь куни икки давлат раҳбарлари – Шавкат Мирзиёев ва Садир Жапаров тегишли шартномани ратификация қилиш тўғрисидаги ҳужжатлар билан алмашдилар, деб хабар беради Қирғизистон президенти матбуот хизмати.

Ратификация Ўзбекистон Президентининг давлат ташрифи доирасида бўлиб ўтди.

«Бугун биз қирғиз-ўзбек давлат чегарасини делимитация қилиш жараёнини якунлаяпмиз. Бу ҳақиқатан ҳам тарихий воқеа. Биз чегара масалалари бўйича мулоқот ва ўзаро мақбул ечимларни излашга тайёрлигимизни намойиш этолдик», — деди Садир Жапаров Шавкат Мирзиёев билан кенгайтирилган таркибдаги учрашувда.

ℹ️ Ўзбекистон ва Қирғизистон ўртасидаги келишувда умумий узунлиги 302,29 километр бўлган чегара чизиғи, жумладан, қўшма чегаранинг 35 та участкаси белгиланган. Ўзбекистон тасарруфига Андижон/Кампиробод сув омборининг 4957 гектар ҳудуди ва тўғонни сақлаш ва муҳофаза қилиш учун қўшимча 19,5 гектар ўтади. Қирғизистонга Андижон сув омборининг чап қирғоғида қурилмаган Кемпиробод канали учун компенсация сифатида 1019 гектар, Ғовасой участкасидан 12849 гектар яйлов эрлари берилди. Шу билан бирга, Қирғизистон томони Ғовасой дарёсининг табиий оқимига тўсқинлик қилувчи гидротехник ва бошқа иншоотларни қурмаслик, сувнинг техник ифлосланишига йўл қўймаслик мажбуриятини олди.

Шартнома ва у билан тасдиқланган Андижон/Кампиробод сув омбори сув ресурсларини биргаликда бошқариш тўғрисидаги келишув Қирғизистон аҳолисининг бир қисмида салбий муносабат уйғотди. Сув омбори ҳудудини Ўзбекистонга бериш қароридан норози бўлган қирғиз фаоллари ва сиёсатчилари «Кампирободни ҳимоя қилиш қўмитаси»ни туздилар. Эртаси куни кўплаб қўмита аъзоларининг уйлари тинтув қилинди, 20 дан ортиқ киши ҳибсга олинди, уларнинг аксарияти икки ойга ҳибсга олинган ҳолда тергов изоляторига жўнатилди. Собиқ депутат Орозайим Нарматова ва фуқаролик фаоли Илгиз Шаменов Россияда ҳибсга олинган ва Қирғизистонга депортация қилинган.

Кейинроқ қўмита аъзолари Ўзбекистон президенти Шавкат Мирзиёевни сув омбори бўйича шартномани имзолашни кечиктиришга чақирди. Декабрь ойида «Кампир-Обод иши» бўйича ҳибсга олинганларнинг деярли барчаси икки ҳафтадан кўпроқ сиёсий очлик эълон қилишди. 26 ва 27 декабрь кунлари Бишкек шаҳар суди ҳибсга олинганлар адвокатларининг эҳтиёт чорасини уй қамоғига ўзгартириш ҳақидаги шикоятларини кўриб чиқди, бироқ уларнинг бирортасини қаноатлантирилмади.

Шу йилнинг январ ойида «Кампир-Обод» иши бўйича материаллар махфийлаштирилгани маълум бўлди.

Ўзбекистон Президентининг Қирғизистонга давлат ташрифи куни «Кампиробод иши» бўйича ҳибсга олинганларнинг яқинлари Шавкат Мирзиёевга мурожаат қилишди.

Улар «24 киши 100 кундан ортиқ вақтдан бери ҳибсда сақланмоқда ва фақат Кампиробод сув омборини сиз томонингизга ўтказиш масаласида ўз келишмовчилигини билдиришга журъат этганлари учун» дея таъкидлашган.

«Бугун бу масалага чек қўйилади, аммо азоб-уқубатларимиз қачон тугаши, маҳбуслар узоқ кутилган озодликка қачон чиқиши маълум эмас», — дейилади мурожаатда.

Мурожаат муаллифлари ишда айбланувчиларнинг ҳеч бири Қирғизистон барқарорлиги ва чегара масаласини ҳал қилиш учун ҳеч қандай хавф туғдира олмаслигини таъкидлашган.

«Ушбу мурожаат билан сиз имзолайдиган шартнома кўз ёшларимизга ювилганини эслатмоқчимиз. Бу ҳолат эса, бизнингча, халқларимиз ўртасидаги ўзаро англашув, дўстлик ва ҳамкорликни мустаҳкамлашга асло хизмат қилмайди», — дейди ҳибсга олинганларнинг яқинлари.