Фото с сайта avesta.tj
Тожикистонда кўчада, боғларда, стадионларда ва жамоат транспортида чекиш, жумладан, электрон сигареталар учун ҳам жарима миқдори оширилди. Агар илгари бундай ҳуқуқбузарлик учун энг юқори жазо 216 сомони (20 доллар) бўлган бўлса, энди бу кўрсаткич 360 сомонига (34 доллар) ошди, деб ёзади «Азия-Плюс».
Нашр маълумотларига кўра, парламентнинг юқори палатаси 19 июнь куни Тожикистоннинг Маъмурий жавобгарлик тўғрисидаги кодексига тегишли тузатишларни маъқуллаган. Эртаси куни республика президенти Эмомали Раҳмон чекувчиларга нисбатан жазо чораларини кучайтириш тўғрисидаги фармонни имзолаган.
Шундай қилиб, жисмоний шахслар учун жарималар ҳисоблаш бирдан учта кўрсаткичгача бўлган миқдордан — 72 (7 доллар) дан 216 сомонигача (20 АҚШ доллари) — учдан беш кўрсаткичгача кўтарилди, энди бу эса мос равишда 216 (20 доллар) ва 360 сомонини (34 доллар) ташкил этади.
Жарималарнинг ошиши тамаки маҳсулотлари ва электрон сигареталар сотувчи тадбиркорларни ҳам қамраб олади. Нотўғри жойда савдо қилганликлари учун улар энди 3600 (338 доллар) дан 7200 сомонигача (677 доллар) тўлайдилар.
Сигареталар ва шунга ўхшаш маҳсулотларни чакана савдоси учун мўлжалланган махсус жойларда маълумотлар ёки жиҳозларни жойлаштириш талабларини бузганлик учун ҳам жарималар оширилди. Жисмоний шахслар учун: ҳисоблаш миқдори 100-200 кўрсаткичгача — 7200 (677 доллар) дан 14400 сомонигача (1355 доллар); компаниялар учун — 14 400 (1 355 доллар) дан 21 600 сомонигача (2 032 доллар).
ℹ️ Тожикистонда 2010 йилдан бошлаб мактаблар, шифохоналар, корхона бинолари, аэропортлар, вокзаллар, дам олиш масканлари, спорт ва маданият иншоотларида, шунингдек, жамоат транспортида тамаки маҳсулотларини сотиш тақиқланган. 2017 йилда талаблар кучайтирилган — шундан бери сигаретани нафақат муассасаларнинг ўзида, балки яқин атрофдаги ҳудудларда ҳам сотиш тақиқланган. Бундан ташқари, мулкчилик шаклидан қатъи назар, корхона ва ташкилотлар раҳбариятига ходимлар учун махсус чекиш жойлари ажратиш мажбурияти юкланган.
