Алимқодир Бейшеналиев. aki.kg сайти фотосурати
Алимқодир Бейшеналиев Қирғизистон Соғлиқни сақлаш вазири лавозимини тарк этди. Бу ҳақда амалдорнинг ўзи «АКИпресс» нашри журналистларига маълум қилди.
Бейшеналиевнинг сўзларига кўра, унинг ишида хатоликка йўл қўйилган, шунинг учун у ишдан бўшатиш тўғрисида ариза ёзишга қарор қилган. Мулозим соғлиқни сақлаш тизимидаги ислоҳотлар усиз ҳам давом этишига умид билдирган. Шунингдек, Бейшеналиев жарроҳ экани ва бу касбга қайтиши мумкинлигини ҳам эслатиб ўтган.
Sputnik Қирғизистон нашри вазирнинг сўзларига таяниб, истеъфога депутатлар хоҳиши сабаб бўлганини маълум қилади. «Улар жума жонимга тегишди, мен бироз нотўғри жавоб бердим. <…> Дам олиш кунларида мен оилам билан гаплашдим ва бир қарорга келдим. Хотиним қаттиқ касал, унга ғамхўрлик қилишим керак. Президентдан сўрадим, у маъқуллади», — деди Бейшеналиев.
Эслатиб ўтамиз, ушбу янгилик эълон қилинган пайтда мамлакат президенти Садир Жапаров сайтида Бейшеналиевни Соғлиқни сақлаш вазирлиги раҳбари лавозимидан озод этиш ҳақидаги фармон ҳали эълон қилинмаган эди.
ℹ️ Алимқодир Бейшеналиев икки марта Қирғизистон Соғлиқни сақлаш вазири лавозимига тайинланган. У биринчи марта 2020 йил октябрь ойида лавозимни эгаллаган. Тез орада у COVID-19 ни Иссиқкўлнинг заҳарли илдизи аконит дамламаси билан даволаш таклифи билан машҳур бўлганди.
2022 йил июнь ойида Бейшеналиевга нисбатан Жиноят кодексининг қатор моддалари, жумладан коррупция ва порахўрлик бўйича еттита жиноий иш қўзғатилгани хабар қилинганди. Амалдор лавозимидан четлаштирилиб, тергов изоляторига жойлаштирилган, бироқ икки ҳафтадан сўнг уй қамоғига ўтказилган.
2022 йил август ойида давлат хизматчисининг ҳаракатларида жиноят таркиби йўқлиги сабабли жиноий иш ёпилган, бироқ Соғлиқни сақлаш вазирлиги раҳбари ўз лавозимини йўқотган. 2023 йил сентябрида Бейшеналиевга вазирлик ўрни қайтарилган эди.
Вазирга республика парламенти депутатлари бир неча бор «ҳужум» қилишган ва уни қўл остидаги ходимларни ишга олишда фирибгарлик қилгани, коррупция ва ўғирликда айблашган. Даъволар ҳатто суд жараёнига асос бўлган. Шундай қилиб, 2024 йил июнь ойида Бишкек суди депутат Жусупбек Қўрғонбай уулуни мулозимга 10 минг сом (114 доллар) тўлашга мажбур қилиб, Бейшеналиевнинг даъвосини қаноатлантирган.
