Адилет Барменкулов. sports24.kz сайти фотосурати
Қозоғистон футбол федерациясининг собиқ президенти Адилет Барменқулов ҚФФда йирик миқдорда маблағлар ўғирланиши ишида гумондор деб топилмади. Бу ҳақда Республика Молиявий мониторинг агентлигига (ММА) таяниб, Zakon.kz хабар берди.
«Барменкуловни ҳозирда гумондор деб топилмадик, унга нисбатан квалификация берилмади. У жиноий ишга топтилмаган», – деди ММА раҳбари ўринбосари Женис Елемесов.
Елемесов маблағлар ўғирланишига оид тергов ишлари олиб борилаётганини тасдиқлади, бироқ судгача терговга оид бирорта маълумот келтирмади.
Март ойи охирида Қозоғистон Бош прокуратураси ҚФФ ва бир қатор клубларда самарасиз бошқарув ва молиявий қонунбузарликлар аниқлангани, бунинг натижасида 3 миллиард тенге (6 миллион доллар) миқдорида зарар етказилгани ҳақида хабар берганди. Терговга қадар текширувлар бошланган. Футбол федерациясининг собиқ раҳбарларига нисбатан қўзғатилган жиноят иши Молиявий мониторинг агентлигига ўтказилган. Бироқ, Бош прокуратура ўз ҳисоботида қонунбузарликда гумон қилинаётган аниқ шахслар номини келтирмаган.
Адилет Барменқулов камида уч йил ҚФФ президенти бўлган. У мазкур лавозимни 2022 йил февралидан 2024 йил ноябригача эгаллаган. Бу даврда уни бир неча бор молиявий ҳуқуқбузарликда айблашган, танқид қилишган, унинг криминал ўтмишини тилга олишган.
Барменқулов истеъфога чиққанидан сўнг дарҳол Коррупцияга қарши кураш агентлиги унинг фаолияти юзасидан текширув бошлаганини хабар қилган. Март ойи бошида Барменқулов ва бошқа бир қатор собиқ Федерация ходимларининг уйларида тинтувлар ўтказилгани ҳақида маълумот пайдо бўлди. Молиявий мониторинг агентлиги ҚФФнинг собиқ раҳбариятига нисбатан терговга қадар текширув бошланганини тасдиқлаган, бироқ бирорта исм-шариф тилга олинмаган.
