ritmeurasia.ru сайти фотосурати
Тожикистон ҳукумати ўз олдига пахтани қайта ишлашни 100 фоизга ошириш ва шу орқали тайёр тўқимачилик маҳсулотлари экспортини ўн баробар ошириш вазифасини қўйган. Республика Бош вазири Қоҳир Расулзода Душанбе шаҳрида бўлиб ўтган биринчи Халқаро тўқимачилик форуми очилишида улкан режалар ҳақида гапирди, деб хабар беради «Азия-Плюс» нашри.
Бош вазирнинг аниқлик киритишича, бугунги кунда мамлакатда етиштирилган пахтанинг атиги 30 фоизи қайта ишланмоқда, бу жуда кам. Аммо шу билан бирга, хом ашёни тўлиқ ҳажмда тайёр маҳсулотга айлантириш циклини ўрнатиш ғояси ҳақиқатга тўғри келмайди. Сиёсатчининг фикрича, бундай ёндашув импорт ўрнини босиш ва экспорт ҳажмини ошириш имкониятларини яратади.
«Бугунги кунда Тожикистон тўқимачилик маҳсулотлари 15 дан ортиқ мамлакатларга экспорт қилинмоқда ва бу рўйхатни кенгайтириш имкониятлари катта», — деди бош вазир.
Расулзода ушбу режаларнинг амалга оширилиши республиканинг жаҳон бозоридаги ўз ўрнини мустаҳкамлаш, минглаб иш ўринлари яратиш ҳамда барқарор иқтисодий ўсишни таъминлаш имконини беришини алоҳида таъкидлади.
Тожикистон Саноат ва янги технологиялар вазири Шерали Кабир, ўз навбатида, пахта-тўқимачилик саноатини ривожлантириш тўртинчи миллий стратегиянинг келгуси беш йилда жадал саноатлаштириш ва ишлаб чиқариш ҳажмини икки баравар оширишга қаратилган вазифаларини ўзида акс эттиради, деди.
Вазирнинг қўшимча қилишича, тўқимачилик соҳаси эндиликда инновациялар марказига айланиб бормоқда. У статистик маълумотларни келтирди, унга кўра ўтган йили ушбу маҳсулотлар ва пахта толаси экспорти 300 миллион долларни ташкил этган. Аммо, Кабирнинг сўзларига кўра, инвестицияларни жалб қилиш ва ёпиқ ишлаб чиқариш занжирларини яратиш орқали бу кўрсаткични 3 миллиард долларгача ошириш мумкин.
Шу муносабат билан пахта етиштиришдан тайёр маҳсулот чиқаришгача бўлган тўлиқ циклли кластерлар аллақачон шаклланмоқда. Бундан ташқари, республикада хорижий инвесторлар учун қулай шарт-шароитлар яратилмоқда, хусусан, солиқ ва божхона имтиёзлари, инфратузилмага эга саноат зоналари, кичик ва ўрта бизнесни қўллаб-қувватлаш бўйича қарорлар қабул қилинмоқда.
Икки йил аввал қабул қилинган тўқимачилик саноатини ривожлантириш стратегиясига кўра, Тожикистон ушбу соҳада 600 мингдан ортиқ кишини иш билан таъминлаш ва мамлакат ичида хомашёни тўлиқ қайта ишлашни режалаштирмоқда, дея хулоса қилди вазир.
ℹ️ 8-10 июль кунлари Душанбе шаҳрида Тожикистон ҳукумати кўмагида Саноат ва янги технологиялар вазирлиги томонидан ташкил этилган Биринчи Халқаро тўқимачилик форуми бўлиб ўтмоқда. Тадбирда 50 дан ортиқ давлатдан делегациялар иштирок этмоқда. Форумдан кўзланган мақсад Марказий Осиё республикасининг тўқимачилик саноатининг истиқболли маркази сифатидаги салоҳиятини намойиш этиш, экспорт имкониятларини кўрсатиш ва иқтисодиётнинг асосий тармоқларидан бирига сармоя жалб этишдан иборат.
