ztb.kz сайти фотосурати
Қозоғистон президенти Қосим-Жомарт Тўқаев тиббиёт ходимларига ҳужум қилганлик учун жазони кучайтиришни буюрди. Бу ҳақда унинг матбуот котиби Руслан Желдибай ўзининг Телеграм-каналида хабар берди.
Унга кўра, тиббиёт ходимларининг соғлиғи ва фаровонлигига путур етказувчи бундай ҳодисаларга «қонуний йўллар билан» қатъий чек қўйиш керак. Ҳукумат қонун ҳужжатларига тегишли тузатишлар ишлаб чиқиши лозим.
Аввалроқ бир гуруҳ депутатлар тиббиёт ходимларига нисбатан жисмоний куч қўллаганлик учун жазони кучайтириш ташаббуси билан чиққан эди. Бир кун аввал Мажилис депутати Асхат Аягамбетов ўзининг Телеграм-каналида у ва унинг ҳамкасблари Жиноят кодексига уч марта ўзгартириш киритиш ташаббуси билан чиққани ва тиббиёт ходимларига нисбатан зўравонлик учун полиция ходимлари ва ўрмон қоровулларига ўхшаб алоҳида жавобгарлик жорий этишни таклиф қилишгани ҳақида ёзган. «Ҳозирча ташаббусларимиз қўллаб-қувватланмади, чунки ҳукумат бу нормалар бўйича салбий фикр билдирган», — дея қўшимча қилган у.
Тиббиёт ходимларига ҳужум қилганлик бўйича икки шов-шувли воқеадан сўнг мазкур масала муҳокамаси қайта тикланди – Қарағандада бир эркак катта ҳамширани иш жойида калтаклаган, аёлнинг мияси чайқалган, бармоқлари синган ва бошқа жароҳатлар олган, Қўстанайда эса 17 июль куни бемор уролог жарроҳни калтаклаган. Навбатда турган эркак шифокорга ташланган, натижада шифокор ҳушини йўқотган ва комага тушиб қолган. Унга бош мия жароҳати, қон кетиши ва бош чаноғининг орқа суяги синиши ташхиси қўйилган. Ҳужум қилган шахс икки ойга ҳибсга олинган.
