Ўзбекистон президенти матбуот хизмати фотосурати
Тошкентнинг Янги Ўзбекистон кўчасида соатига 10 мингдан зиёд автомобилни ўтказиш имкониятига эга ерости автомобил йўли очилди. Республика президенти Шавкат Мирзиёев 29 август куни мазкур иншоот билан танишди, деб хабар қилади унинг матбуот хизмати.
Туннелнинг узунлиги 468 метр, кенглиги 25 метрни ташкил қилади. Туннелнинг усти яшил ҳудудга айлантирилиб, «Янги Ўзбекистон» боғи билан Олимпия шаҳарчаси ўртасида пиёдаларнинг хавфсиз ҳаракатланиши таъминланди. Шунингдек, мазкур йўналишда лойиҳалаштирилган метро йўли учун туннел ва бекат ҳам қурилди.
Таъкидлаш жоиз, республикада амалга оширилаётган ҳар бир лойиҳада экологик жиҳатлар алоҳида инобатга олинади. Янги Ўзбекистон кўчасида барпо этилган ерости автомобиль йўли машиналарнинг вақт сарфини 2 баробарга қисқартириб, кунига бир тонна ёнилғи иқтисод қилинишига ва атмосферага чиқариладиган зарарли газлар миқдори икки тоннага камайишига сабаб бўлади.
Давлат раҳбари ерости автомобиль йўлининг замонавий стандартлар асосида ташкил этилганига эътибор қаратди. Бу каби равон йўллар халққа қулайлик яратиб, туризм ривожига ҳисса қўшиши қайд этилди.
Йўл инфратузилмасини ривожлантириш ва транспортлар ҳаракатига қулайлик яратиш – мунтазам жараён. Бу, айниқса, аҳоли сони ошиб, ҳудуди кенгайиб бораётган Тошкент учун долзарб масала. Хусусан, сўнгги йилларда Янги Ўзбекистон кўчасида истироҳат боғи, уй-жойлар, университет ва Олимпия шаҳарчаси қурилди. Бу кўча келгусида Янги Тошкент шаҳрига олиб борувчи асосий йўллардан бири бўлади.
