Мурат Нуртлеу. mfa.gov.kz сайти фотосурати
Қозоғистон президенти ёрдамчиси Руслан Желдибай собиқ Ташқи ишлар вазири Мурат Нуртлеунинг Қосим-Жомарт Тўқаев администрациятига ўтказилиши сабабларини айтиб, «ОАВдаги сўнгги кадрлар ўзгаришлари бўйича сўровларига жавобан» тушунтириш берди.
«Давлат раҳбари ўзининг сўнгги Мурожаатномасида миллий иқтисодиётга қўшимча инвестицияларни жалб қилиш бўйича саъй-ҳаракатларни кучайтириш бўйича устувор йўналишларни белгилаб берди», — деб ёзади Желдибай. —Ушбу муҳим соҳа масъулияти тажрибали дипломат Мурат Нуртлеу зиммасига юкланган. Президент ёрдамчиси сифатида у халқаро сармоявий ва савдо ҳамкорлигини ривожлантиришни жадаллаштириш мақсадида хорижий давлатлар вакиллари, шунингдек, йирик хорижий компаниялар раҳбарлари билан юқори даражадаги алоқаларни ривожлантиради».
Президент ёрдамчиси, шунингдек, Жаслан Мадиевнинг Бош вазир ўринбосари, Сунъий интеллект ва рақамли ривожланиш вазири лавозимига тайинланганини ҳам эслатиб ўтди. Мадиевга ўз мурожаатида таъкидланганидек, Қозоғистонни рақамли давлатга айлантириш мақсадини амалга ошириш вазифаси юкланади. «Президент унга стратегик аҳамиятга эга бўлган галдаги муҳим ишларни тушунтириб берди», — дейилади хабарда.
Бундан ташқари, Бош вазир билан келишилган ҳолда, парламент қуйи палатаси депутати Жулдиз Сулайменовани Таълим вазири этиб тайинлаш тўғрисида қарор қабул қилинди. У ўзининг фаол жамоатчилик фаоллиги ва таълим соҳасидаги катта тажрибаси билан машҳур, деди президент ёрдамчиси.
Желдибай ҳукуматдаги барча сўнгги ўзгаришларни ҳукумат фаолиятининг энг муҳим соҳаларида самарадорликни оширишга қаратилган «одатдаги кадрлар алмашинуви» деб таърифлади.
Президент Тўқаевнинг энг яқин сафдошларидан бири бўлган Мурат Нуртлеу Ташқи ишлар вазири лавозимидан истеъфога чиққани ўтган жума, 26 сентябрь куни эълон қилинган эди. Ермек Кошербаев вазирликнинг янги раҳбари этиб тайинланди.
Истеъфодан бир оз аввал Қозоғистоннинг Orda.kz нашри Мурат Нуртлеу ва тадбиркор, Қозоғистон оғир атлетика федерацияси раҳбари Гажи Гаджиев ҳибсга олингани ҳақида хабар тарқатган эди. Ҳуқуқ-тартибот органларидаги манбалар амалдор ва тадбиркорнинг уйларида тинтув ўтказилганини иддао қилишган. Расмийлар нашрни фейк хабарлар тарқатишда айблаб, бу маълумотни рад этди.
