Абдулазиз қори Зокиров. eltr.kg сайти фотосурати
Қирғизистон муфтийси Абдулазиз қори Зокиров эркакларни аёлларга ҳурмат-эҳтиром кўрсатишга чақирар экан, уларга нисбатан зўравонлик «гуноҳи кабира ва Аллоҳ таолога қарши қилинган иш» дея таъкидлади. Дин арбоби сўзларини «Кабар» миллий агентлиги келтирган.
Муфтий аёллар жамиятнинг юраги, оила посбони, бўлажак она эканини таъкидлади. Унинг фикрича, исломда қизларга меҳр-мурувватли бўлиш рағбатлантирилган ва «жаннат оналар оёғи остида» экани айтилган.
Зокиров Қуръонга кўра мусулмон эркакларига бузуқлик ва бегуноҳ қон тўкиш қатъиян ман этилгани, аёлга нисбатан ҳар қандай зўравонлик ўз онасига ёки қизига тажовуз, дея ҳисобланишини эслатиб ўтди.
Муфтийнинг таъкидлашича, қирғизлар азалдан аёл қадр-қимматини ҳурмат қилгани билан машҳур бўлган: қизларга шарафли ўринлар берилган, оналар эса малика сифатида улуғланган. Аммо бугунги кунда, Зокиров таъкидлаганидек, мамлакатда аёлларга нисбатан зўравонлик ҳолатлари кўпайган. У бундай ҳодисаларни «фожиа ва жамият учун шармандалик» деб атади.
«Эркакнинг ҳақиқий кучи қўполликда эмас, балки раҳм-шафқат ва ўзини тута билишдадир. Аёлни ҳурмат қилиш иймондандир!» — деди у.
Ушбу мавзуни давом эттирган уламо эркакларни ўғилларини одоб-ахлоқ, ор-номус руҳида тарбиялашга, ўғил болалар ҳар бир қизга ўз опаси ёки қизидек муносабатда бўлишларига чақирди.
«Аллоҳ таоло аёлларни ҳурмат қилганларни улуғлайди, золимларни ҳам бу дунёда, ҳам охиратда жазолайди», — дея хулоса қилди муфтий.
Сентябр ойи охирида зўрланган ва бўғилиб ўлдирилган 17 ёшли қоракўллик қиз тақдири Қирғизистонда кенг жамоатчилик эътирозига сабаб бўлди. Тез орада хавфсизлик кучлари гумонланувчини, 1984 йилда туғилган, илгари судланган шахсни қўлга олган.
Президент Садир Жапаров мазкур жиноятга эътибор қаратиб, ишни шахсий назоратига олди. Бундан ташқари, давлат раҳбари педофиллар, шунингдек, аёлларни зўрлаб, сўнг ўлдирганлик учун ўлим жазосини жорий этишни буюрди.
