Абдулазиз Комилов. Ўзбекистон ТИВ сайти архив фотосурати
Президентлар Шавкат Мирзиёев ва Дональд Трамп ўртасидаги музокаралардан сўнг Ўзбекистон ва АҚШ муносабатлари барқарорлик ва прогноз қилса бўладиган босқичига ўтди. Бу ҳақда президентнинг ташқи сиёсат бўйича маслаҳатчиси Абдулазиз Комилов «Ўзбекистон 24» телеканалига берган интервьюсида таъкидлади, деб ёзади «Газета.uz».
Унинг сўзларига кўра, мамлакатлар ўртасидаги муносабатлар икки шартли босқичдан ўтган. 2017 йилгача ҳамкорлик «етарлича барқарор бўлмаган» ва асосан хавфсизлик ва Афғонистон масалалари билан чекланган. «Савдо-иқтисодий ёки инвестиция соҳасидаги ҳамкорликка келсак, афсуски, бу борада сезиларли натижаларга эриша олмаганмиз», — деб таъкидлади у.
2016 йили президент Мирзиёев ҳокимиятга келганидан сўнг вазият ўзгарди. Комилов Ўзбекистон раҳбарининг 2018 йили Вашингтонга расмий ташрифи стратегик шерикликнинг янги даврини бошлаб берганини қайд этди. Унинг таъкидлашича, икки томонлама ҳамкорлик кун тартиби энди янада кенгайиб, нафақат хавфсизлик масалалари, балки савдо-иқтисодий, гуманитар, таълим ва сармоявий соҳаларни ҳам қамраб олган.
«Америка элитасининг деярли барча вакиллари, жумладан, сиёсий доиралар ва бизнес вакиллари мамлакатлар ҳамкорликнинг янги босқичи бошланаётганини тан олмоқда», — деди Комилов.
Тошкент ва Вашингтон ўртасидаги олий даражадаги музокараларнинг асосий натижаси, маслаҳатчининг фикрига кўра, муносабатлар барқарорлик ва прогноз қилиш мумкин бўлган босқичига ўтди. Комиловнинг қайд этишича, ҳозирда икки томон ҳам стратегик масалаларни, ҳам ҳамкорликнинг узоқ муддатли истиқболларини муҳокама қилиш имкониятига эга.
Комилов Шавкат Мирзиёевнинг БМТ Бош Ассамблеясида илгари сурган халқаро ташаббусларига ҳам алоҳида тўхталиб ўтди. Маслаҳатчи бу таклифлар мамлакат миллий манфаатларига асослангани ва глобал аҳамият касб этишига урғу берди.
«Ташаббус ва таклифлар, улар Ўзбекистон Республикасининг ҳаётий муҳим миллий давлат манфаатларига бевосита алоқадор. Нега улар глобал? Чунки Ўзбекистон атрофидаги минтақада мавжуд бўлган бир қатор чақириқ ва таҳдидлар, хавф-хатарларни фақат кенг халқаро ва ҳатто глобал даражада ҳал қилиш мумкин», — деди Комилов.
Унинг сўзларига кўра, минтақавий хавфсизлик, экология, Орол тақдири, ёшлар масаласи Тошкентнинг устувор йўналишлари бўлиб қолмоқда. Комилов Мирзиёевнинг диққат марказида «биринчи навбатда Ўзбекистон, Ўзбекистон ва яна бир бор Ўзбекистон» туришини айтиб ўтди.
ℹ️ Абдулазиз Комилов 1947 йил ноябрь ойида Янгийўл шаҳрида туғилган ва СССР Ташқи ишлар вазирлиги Дипломатик академиясини тамомлаган. У тарих фанлари номзоди, араб ва инглиз тилларини билади. Меҳнат фаолиятини Ливан ва Суриядаги совет элчихоналарида бошлаган, кейин СССР Ташқи ишлар вазирлиги ва илмий муассасаларда ишлаган. 1991 йилдан сўнг мустақил Ўзбекистон тузилмаларига ўтган: Россиядаги элчи маслаҳатчиси, Миллий хавфсизлик хизмати раҳбари ўринбосари, 1994 йилдан Ташки ишлар вазирининг биринчи ўринбосари, сўнг Ташқи ишлар вазири ва бир вақтнинг ўзида Жаҳон иқтисодиёти ва дипломатия университети ректори лавозимларида ишлаган.
Президентнинг ташқи сиёсат бўйича давлат маслаҳатчиси сифатида тўрт йил ишлаганидан сўнг (2003 йил) Комилов АҚШ, Канада ва Бразилияга (қароргоҳи Вашингтонда) элчи этиб юборилган. 2010 йили яна вазирнинг биринчи ўринбосари, 2012-2022 йиллари Ташқи ишлар вазири лавозимида ишлаган. 2022 йил апрель ойида у Хавфсизлик кенгаши котиби ўринбосари, 2022 йил июнь ойида президентнинг ташқи сиёсат бўйича махсус вакили бўлиб ишлаган, 2025 йил июль ойида эса президентнинг ташқи сиёсат бўйича маслаҳатчиси лавозимига ўтган.
