Премьер-лига матбуот хизмати фотосурати
2026 йилги мавсумда Қирғизистон олий футбол лигасидаги жамоалар сони 14 тадан 16 тага кўпаяди. Бу ҳақдаги қарор Қирғизистон футбол иттифоқи ижроия қўмитаси йиғилишида қабул қилинди, деб хабар беради ҚФИ матбуот хизмати.
Клублар сонини кенгайтириш учун футбол чемпионати регламентига жиддий ўзгартиришлар киритилди. Хусусан, Премьер-лиганинг жорий мавсумида охирги ўринни эгаллаган жамоани қуйи лигага тушириш қоидаси, шунингдек, Премьер-лигада иккинчи ўринни эгаллаган жамоа ва Миллий лигада (иккинчи дивизион) иккинчи кучли жамоа ўртасида ўтказилиши керак бўлган плей-офф ўйини қоидаси бекор қилинди.
Бироқ, бу мавсумда кўтарилиш борасида гап бориши мумкин эмас, чунки Миллий лигадаги жамоалар лицензияга эга эмас ва шунинг учун Премьер-лигага киритилмайди. Шу боис, турнирни ташкил этишнинг янги тартибини тасдиқлашга қарор қилинди.
Лицензиялаш талабларига жавоб берадиган ва Олий лигада иштирок этиш истагини билдирган Миллий лига клублари ўртасидаги мини-турнир ғолибига битта ўрин берилади. Иккинчи ўрин Норин, Боткен ёки Талас вилоятларининг олий лигада иштирок этмаган клубларига насиб этади. Агар шундай жамоалар бир нечта бўлса, улар плей-офф ўйинларида иштирок этадилар. Шу тариқа мамлакат футбол раҳбарияти лига географиясини сунъий равишда кенгайтирмоқда.
Эслатиб ўтамиз, 2025 йилги мавсум бошланишидан олдин клублар сони 10 тадан 14 тага кўпайтирилган эди. Ушбу қарордан бир неча ой олдин ташкил этилган тўртта мутлақо янги клублар ҳам эълон қилинган эди: «Азиагол» (Бишкек), «Бишкек Сити», «Барс» (Қоракўл) ва «Ўзган». Айрим клубларда ҳамон инфратузилма йўқ. «Азиагол» ва «Бишкек Сити» турнир жадвалининг қуйи поғонасида жойлашган. Келгуси мавсумда инвесторларнинг ушбу жамоаларга қизиқиши сақланиб қоладими, йўқми — бу номаълум.
