Россия ва Ўзбекистон делегациялари музокаралари. Россия ҳукумати матбуот хизмати фотосурати
Россиянинг «Газпром» энергетика компанияси 2025 йили Ўзбекистонга 7,7 миллиард куб метр табиий газ етказиб беришни режалаштирмоқда, бу ўтган йилга нисбатан 2 миллиард куб метрдан кўпроқ. Россия ҳукумати матбуот хизмати хабарига кўра, Россия Бош вазири ўринбосари Александр Новак давлат компаниясининг экспорт шартномалари бўйича мажбуриятларини бажариши ҳақида маълум қилди.
Новак ва Ўзбекистон Энергетика вазири Жўрабек Мирзамаҳмудовнинг Россия энергетика ҳафталиги доирасида бўлиб ўтган учрашувида икки давлат ўртасидаги ҳамкорлик муҳокама қилинган.
Қайд этилишича, «Газпром» «зангори олов»ни етказиб беришда давом этади ва йил охиригача ўз келишувларини бажариб, Марказий Осиё республикасига 7,7 миллиард куб метр газ етказиб беради.
Шу билан бирга, етказиб бериш ҳажмини, жумладан, суюлтирилган газни кўпайтириш истиқболлари ҳам катта, деди Бош вазир ўринбосари.
Йиғилишда 2024 йили Россия Ўзбекистонга 233,5 минг тонна нефть етказиб бергани маълум қилинди. Шу билан бирга, ушбу соҳада фаолият юритаётган компаниялар Марказий Осиё республикаси билан ҳамкорликни кенгайтириш масаласини кўриб чиқмоқда. Хусусан, бу фойдали қазилма захиралариқазиб олиш қийин бўлган конларни ўзлаштириш лойиҳаларига тааллуқлидир.
Новак ва Мирзамаҳмудов атом соҳадаги ҳамкорликни ҳам муҳокама қилиб, Ўзбекистонда биринчи атом электр станциясини қуриш муҳимлигини қайд этди. Томонлар лойиҳа битта майдонда ҳам кичик, ҳам катта қувватли атом электр станциясини қуришни назарда тутишини тасдиқладилар. Бундан ташқари, кичик қувватли станциянинг биринчи энергоблокида монтаж ишлари бошлаб юборилган.
ℹ️ 2023 йил июнь ойида Ўзбекистон «Газпром» билан йилига 2,8 миллиард куб метр — кунига 9 миллион кубометр газ сотиб олиш бўйича икки йиллик шартнома имзолаган. Ўша йилнинг декабрь ойида Тошкент илтимосига кўра Россия энергетика гиганти етказиб бериладиган газ ҳажмини икки баробарга оширди.
Россия компанияси ҳисоботларига кўра, 2024 йили Марказий Осиё республикасига табиий газ экспорти 5,64 миллиард куб метрга етган.
Ёқилғи Қозоғистондан транзит ўтувчи «Ўрта Осиё-Марказ» қувури орқали етказиб берилади. 2026 йилдан бошлаб Россия газининг Ўзбекистонга транзити ҳажми яна ўсиб, йилига 11 миллиард куб метрга етиши кутилмоқда.
