Ҳасан Қасимбаев. Ижтимоий тармоқ фотосурати
Олмаота вилоятининг Талгар туман суди ОАВ «Хуторские» уюшган жиноятчилик гуруҳининг етакчиси деб таърифлаган Ҳасан Қасимбаевга нисбатан ҳукм чиқарди, деб хабар беради Tengrinews.kz нашри.
У одам ўғирлаш, қасддан оғир тан жароҳати етказиш ва товламачиликда айбдор деб топилган. Қасимбаев барча айбловлар бўйича 12 йилга озодликдан маҳрум қилинган. У жазосини ўртача хавфсизликдаги муассасада ўтайди.
Ишга яна беш нафар судланувчи ҳам алоқадор бўлган. Уларга худди шу айбловлар бўйича 8 йилдан 22 йилгача қамоқ жазоси берилган.
Тергов маълумотларига кўра, 2021 йил ёзида судланувчилар Талгарда аралаш жанг санъати жангчиси ва мураббийи Арман Алимовга ҳужум қилиб, уни калтаклаб, шаҳар ташқарисига олиб чиқишган. Бунинг сабаби, айтилишича, Алимовнинг «Қасимбаев мен учун авторитет эмас» деган баёноти бўлган. Буни эшитган Ҳасан Қасимбаев бу одамни «жазолашга» қарор қилди ва бу ишга ўз шерикларини жалб қилган.
Товламачилик эпизодига келсак, терговчиларнинг фикрига кўра, Қасимбаев ва унинг шериклари бизнесмен Арипжан Тажиевдан дорихонасини бошқариш учун пул ундиришга уринган. Улар жабрланувчини ҳушидан кетгунча калтаклашган ва бир миллион тенге (тахминан 2000 доллар) талаб қилишган.
Сўнгги сўзида Қасимбаев ўзининг айбсизлигини таъкидлаган ва унга қарши қўзғатилган иш сохталаштирилганини даъво қилган. У далиллар етарли эмаслиги сабабли оқловни сўраган, аммо суд судланувчининг далилларини асоссиз деб топган.
Ҳасан Қасимбаевнинг номи Талгарда ўсмир Шерзат Болатнинг ўлдирилишидан сўнг кенг ёйилди. Маҳаллий аҳолининг таъкидлашича, раҳбари Қасимбаев бўлган «Хуторские» уюшган жиноятчилик гуруҳи аъзолари жиноятга алоқадор бўлиши мумкин. У эса ўзини бизнесмен деб, барча бундай айбловларни рад этган. Ички ишлар вазирлиги ўша пайтда Ҳасан Қасимбаевнинг Шерзат ўлимига оид ишда ҳеч қандай мақомга эга эмаслигини таъкидлаганди.
