Акция иштирокчилари. t.me/orda_kz фотосурати
Олмаота вилоятининг Уйғур туманида тахминан 30 киши Хитой байроғи ва Хитой етакчиси Си Цзиньпин портретини ёқиб, норозилик намойиши ўтказди, деб хабар беради ORDA.kz. Намойишчилар Қозоғистон фуқароси Алимнур Турганбайнинг Хитойда ҳибсга олинишига қарши норозилик билдиришган.
«Алимнур Хитойда тўрт ойдан бери ҳибсда. Ўшандан бери Хитой ҳеч қандай аниқ жавоб бермади. Алимнур Қозоғистон фуқароси. У озод қилинмагунча мен қаршилигимни тўхтатмайман», — дея нашр намойишчилардан бирининг сўзларидан иқтибос келтиради.
«У асоссиз ҳибсга олинган. Хитойликлар биродарларимизни лагерда ушлаб туришибди», — дея қўшимча қилади норозилик намойишида иштирок этган бир киши.
Намойишчилар қозоқ ва хитой тилларида мурожаат қилишган, шундан сўнг улар Хитой байроғи ва Хитой етакчиси портретини ёқиб юборишган. Полиция воқеа жойига етиб келиб, намойишчиларни ҳибсга олган.
Кейинроқ Олмаота вилояти полиция бошқармаси матбуот хизмати рухсатсиз норозилик намойишида 12 иштирокчи 15 кунгача ҳибсга олингани ҳақида хабар берди. Улар Маъмурий ҳуқуқбузарликлар кодексининг 434-моддаси (майда безорилик) бўйича айбланган. Яна олти киши 20 ойлик ҳисоб кўрсатгичи (тахминан 150 доллар) миқдорида жаримага тортилган. Нафратни қўзғатиш бўйича алоҳида жиноий иш қўзғатилди, деб қўшимча қилади полиция бошқармаси.
Полиция давлат рамзларига путур етказиш қонунни жиддий бузиш эканини яна бир бор эслатди.
Алимнур Турганбай асли Шинжондаги (Хитойнинг шимоли-ғарбий қисмида жойлашган) Или Қозоқ автоном округидан. У 2017 йили Қозоғистон фуқаролигини олган. Ўтган ёзда у Хитой чегарачилари томонидан ҳибсга олинган ва ўшандан бери қариндошлари билан боғланмаган. Август ойида Турганбайнинг рафиқаси ва қизи Олмаота акимати биноси олдида президент Қосим-Жомарт Тўқаевга видеомурожаат қилишган. Улар президентдан Турганбайни Қозоғистонга қайтаришда ёрдам сўрашган.
Қозоғистон расмийларига кўра, эркакнинг ҳибсга олиниши унинг икки фуқаролиги билан боғлиқ бўлиши мумкин, аммо Турганбайнинг оиласи унинг Хитой фуқаролигидан расман воз кечганини даъво қилади. Унинг қариндошлари Хитой консуллиги ва Ташқи ишлар вазирлиги идораси олдида бир нечта норозилик намойишлари ўтказганлар, бунинг учун улар ҳибсга олинган ва жаримага тортилган.
