Ўзбекистон Энергетика вазирлиги матбуот хизмати фотосурати
Ўзбекистон 2026 йил давомида қўшни Афғонистонга электр энергияси етказиб беришда давом этади. Ушбу келишув томонларнинг 17 ноябрь куни Тошкентда имзоланган келишуви билан қўллаб-қувватланади, деб хабар беради Ўзбекистон Энергетика вазирлиги матбуот хизмати.
Ҳужжат вазирлик раҳбари Жўрабек Мирзамаҳмудов ва Афғонистоннинг Da Afghanistan Breshna Sherkat (DABS) компанияси директори Абдул Бори Умар ўртасидаги музокаралардан сўнг тасдиқланди.
Энергетика вазирлигига кўра, учрашувда жорий йилнинг сентябрь ойида Ўзбекистон президенти Шавкат Мирзиёевнинг БМТ Бош Ассамблеяси 80-сессиясидаги ҳамда куни кеча Тошкентда бўлиб ўтган Марказий Осиё давлатлари раҳбарларининг еттинчи Маслаҳат учрашувидаги нутқларида қўшни Афғонистон халқи фаровонлиги ва иқтисодиётининг ривожи ҳақидаги ташаббуслари икки давлат ҳамкорлигини янада мустаҳкамлашга хизмат қилаётгани алоҳида таъкидланган. Эслатиб ўтамиз, Ўзбекистон Афғонистон иқтисодиётини қатъий қўллаб-қувватлашини таъкидлади, бу эса мамлакатлар ўртасидаги ҳамкорликни янада мустаҳкамлайди.
Шу муносабат билан қўшни давлатлар ўртасида йирик энергетика лойиҳалари амалга оширилмоқда. Жумладан, Мирзамаҳмудов ва DABS раҳбари ўртасидаги учрашувда Афғонистонда юқори кучланишли электр узатиш линиялари ва подстанцияларини қуриш, шунингдек, ушбу лойиҳаларни жадаллаштириш масалалари батафсил муҳокама қилинди.
2025 йил сентябрь ойида Ўзбекистон Афғонистонда 250 миллион долларлик энергетика лойиҳаларини амалий амалга оширишни бошлади. Ўшанда булар Сурхондан Пули-Хумригача 500 кВ электр узатиш линиясини қуриш, Дашт-и-Алвон ва Арганди подстанцияларини модернизация қилиш, шунингдек, 220 кВ линияни Шайх Месри подстанциясига улаш ва мазкур объектни кенгайтиришни ўз ичига олиши маълум бўлганди.
Ушбу лойиҳалар якунлангандан сўнг, Афғонистон Ўзбекистондан 800 дан 1000 МВт гача электр энергиясини олиши кутилмоқда, бу эса мамлакатнинг энергетика инфратузилмасини сезиларли даражада мустаҳкамлайди. Лойиҳалар 2027 йилнинг биринчи чорагида якунланиши режалаштирилган.
Жорий йил август ойида DABS раҳбарияти Афғонистон Туркманистон, Эрон, Ўзбекистон ва Тожикистондан 800 МВт электр энергияси сотиб олаётганини, маҳаллий ишлаб чиқариш эса 250 МВтни ташкил этаётганини маълум қилганди. Компания бош директори Абдул Бори Омарнинг қўшимча қилишича, электр энергияси импорти йилига 250 миллион доллардан 280 миллион долларгача миқдорни ташкил этади.
