Ўзбекистон ва Покистон яқинда Карачи ва Ўзбекистон шаҳарлари ўртасида янги тўғридан-тўғри авиарейсларни йўлга қўйишга, шунингдек, Покистон Миллий банки (ПМБ)нинг Тошкентдаги филиалини қайта очишга келишиб олди, деб хабар беради The Nation.
«Покистон йиллик икки томонлама савдо ҳажмини 2 миллиард долларга етказиш мақсадига эришиш учун саъй-ҳаракатларни тезлаштиради», – деди Бош вазирнинг саноат ва ишлаб чиқариш бўйича махсус ёрдамчиси Харун Ахтар Хон 17 ноябрь куни бўлиб ўтган саккизинчи икки томонлама ҳамкорликни кўриб чиқиш сессиясида.
Исломободда бўлиб ўтган учрашувда Ўзбекистон элчиси Алишер Тахтаев, ҳукумат вакиллари, ишбилармон доиралар ва икки мамлакат дипломатик корпуси иштирок этди. Улар фармацевтика, банк иши, авиация ва тоғ-кон саноати соҳаларида ҳамкорлик истиқболларини муҳокама қилишди.
Авиа қатновлари савдо муносабатларида асосий масалага айланди. Ҳозирда Тошкентдан Исломобод ва Лаҳорга тўғридан-тўғри рейслар амалга оширилмоқда. Алишер Тахтаев бизнес ва туризм алоқаларини ривожлантириш учун Карачи ва Ўзбекистон шаҳарлари ўртасида тўғридан-тўғри рейсларни йўлга қўйишни таклиф қилди. Покистон томони ташаббусни қўллаб-қувватлади ва ушбу йўналишлар савдо ва туризм учун қўшимча имкониятлар очишини ва Ўзбекистонни Форс кўрфази мамлакатлари ва Европа ўртасидаги янги транзит марказига айлантириши мумкинлигини таъкидлади. Покистон Бош вазири Шаҳбоз Шарифнинг кўрсатмаси билан тегишли идораларга ушбу янги рейсларнинг ишга туширилишини тезлаштириш ва мунтазамлигини таъминлаш топширилди.
Молиявий соҳада ПМБнинг Тошкентдаги ваколатхонасини қайта очиш тўғрисида келишувга эришилди, бу иштирокчиларнинг фикрига кўра, икки мамлакатдаги компаниялар ўртасидаги ҳисоб-китоб ва транзакция жараёнларини сезиларли даражада соддалаштиради. ПМБнинг Тошкентдаги ваколатхонаси 1995 йилдан бери фаолият юритиб келмоқда ва 2020 йил июль ойида банкнинг ўз ташаббуси билан унинг бизнес стратегияси ўзгаргани сабабли ёпилганди. Томонлар банк операцияларининг қайта тикланиши бозорнинг яқинроқ интеграциясига ва иқтисодий алоқаларни ривожлантиришга ёрдам беришини таъкидладилар.
Иштирокчилар, шунингдек, Марказий ва Жанубий Осиёни интеграциялашда муҳим элементга айланиши мумкин бўлган Трансафғон темир йўли лойиҳасини ўз ичига олган қуруқлик ва темир йўл инфратузилмасини ривожлантириш муҳимлигини таъкидладилар.
Учрашув иштирокчилари фармацевтика саноатини ривожлантиришга алоҳида эътибор қаратдилар. Ўзбекистон вакиллари Покистоннинг ушбу соҳадаги ишлаб чиқариш салоҳиятини юқори баҳоладилар ва энг яхши тажрибалар билан ўртоқлашишга, хусусан, ўз юртида ўзбек Pharma Park саноат лойиҳасини ишга туширишга қизиқиш билдирдилар. Фармацевтика саноати вакиллари Ўзбекистон бозорида Покистон дори воситаларини сертификатлашдаги мавжуд муаммоларни муҳокама қилишди. Ахтар Хон Покистон Дори воситаларини тартибга солиш бошқармаси (DRAP), Покистон Фармацевтика компаниялари ассоциацияси ва Ўзбекистоннинг назорат органлари иштирокида қўшма қўмита ташкил этилганини эълон қилди. Қўмита сертификатлаш жараёнларини тезлаштириш ва маъмурий тўсиқларни бартараф этишга эътибор қаратади.
Аввалроқ, Тошкент ва Исломобод юк ташиш, янги транспорт йўлакларини ривожлантириш ва тегишли инфратузилма бўйича стратегик ҳамкорлик шартномасини имзолаган эди.
