Камчибек Ташиев ва Роберт Просинечки. ҚФИ матбуот хизмати фотосурати
Хорватиялик мураббий ва Мадриднинг «Реал» ва Хорватия терма жамоасининг собиқ футболчиси Роберт Просинечки футбол бўйича Қирғизистон миллий терма жамоаси бош мураббийи этиб тайинланди. Бу ҳақда Қирғизистон Футбол Иттифоқи (ҚФИ) матбуот хизмати маълум қилди.
Мураббий билан шартнома 13 ойга, Қирғизистон иштирок этадиган 2027 йилги Осиё Кубоги охиригача амал қилади. Агар Просинечки бошчилигида жамоа турнирда яхши ўйин кўрсатса, шартнома яна уч йилга узайтирилиши мумкин. Муваффақият нима эканига аниқлик киритилмаган.
ҚФИ раҳбари Камчибек Ташиев ўз нутқида Просинечкининг келиб қўшилиши жамоага янги туртки бериши ва Иттифоқ хорватиялик мураббий қўл остида жамоада сифат жиҳатидан ўзгаришлар юз беришига ишончи комил эканини таъкидлади.
Просинечки ўз баёнотларида эҳтиёткор бўлди. У қўлидан келганини қилишини, аммо кўп нарса қирғиз футболчилари унинг талабларини қанчалик сифатли бажаришига боғлиқлигини таъкидлади.
Роберт Просинечки — Хорватиянинг энг машҳур футболчиларидан бири. У миллий терма жамоа билан Жаҳон чемпионатида бронза медалини қўлга киритган. У белграднинг «Црвена Звезда», мадриднинг «Реал» ва «Барселона» жамоаларида ўйнаган. Футболчилик фаолиятини тугатгандан сўнг, у мураббий сифатида ишлай бошлаган. Просинечки Туркия ва Хорватия клубларини, шунингдек, Озарбайжон, Босния ва Черногория терма жамоаларини бошқарган.
