cpc.ru сайти фотосурати
Қора денгиздаги Каспий қувурлари консорциумининг (КҚК) муҳим экспорт портида чўзилиб кетган таъмирлаш ишлари туфайли Қозоғистонда нефть қазиб олиш камайиши мумкин, деб ёзади Bloomberg.
Ҳозирда Новороссийск портидаги КҚК терминалидаги учта лангар блокидан фақат биттаси ишламоқда — бири ноябрь ойи охирида Украина дронлари ҳужумидан жиддий шикастланган, иккинчиси эса ўша пайтда режали техник хизматдан ўтаётган бўлган.
Тўлиқ экспорт ҳажмини сақлаб қолиш учун мамлакатга камида иккита ишлайдиган лангар блоки керак. Шу сабаб, ҳисоботда айтилишича, омборларда нефть захиралари тўплана бошлаган.
Дастлаб, дронлардан шикастланмаган битта бардошли лангар ускунасида (БЛУ) техник хизмат кўрсатиш ишлари 11 декабрда якунланиши кутилган эди. Кейинчалик 13 декабрь санаси айтилди. Бироқ, бу масала билан таниш бўлган Bloomberg манбалари таъмирлаш ишлари 15 декабргача давом этишини айтишган — бу аввал кутилганидан кўпроқ муддат.
Агар вазият шундай давом этаверса, омборхоналар тўлиб кетиши мумкин, бу эса Қозоғистонни ишлаб чиқаришни қисқартиришга мажбур қилади, дейди агентликнинг ўз номини ошкор қилмасликни сўраган манбалари (зеро, улар тақдим этган маълумотлар махфий ҳисобланади).
Қозоғистон Энергетика вазирлиги ва КҚК ҳали бу масала бўйича расман изоҳ бермаган.
Каспий қувурлари консорциуми улушига Қозоғистон нефть экспортининг тахминан 80 фоизи тўғри келади, жумладан, Chevron, Exxon Mobil ва Shell каби йирик компаниялари нефть экспорти ҳам шулар жумласидан. Ноябрь ойида КҚКнинг Новороссийскдаги нефть терминалига бир неча бор ҳужум қилинган, уларнинг ичида энг ёмони ой охирида содир бўлган. КҚК Қозоғистондаги йирик конлардан нефтни экспорт қилувчи энг йирик қувур ҳисобланади, шунингдек ундан Россия нефтининг бир қисми ташилади. Bloomberg маълумотларига кўра, ҳужумлар натижасида ноябрь ойида КҚКда юк ташиш ҳажми октябрь ойига нисбатан кунига тахминан 155 000 баррелга камайган.
Бир кун олдин Reuters Қозоғистон декабрь ойида Атасу-Алашанкоу қувури орқали Хитойга тахминан 50 000 тонна Кашаған нефтини етказиб беришни ва бу билан асосий экспорт йўналиши — Каспий қувурилари консорциуми (КҚК) тизимидаги ҳажмни бошқа томонга йўналтиришни режалаштираётганини хабар қилган эди.
