Туркманистон Ички ишлар вазирлигининг Жазони ижро этиш департаменти (ИИВ ЖИД) фаол Мансур Мингеловни муддатидан олдин озод қилиш учун ҳеч қандай қонуний асос йўқлигини маълум қилди. Департамент маҳбуснинг оғир касалликка чалинганига қарамай, қариндошлари илтимосини рад этган. Бу ҳақда Turkmen.news нашри хабар берди.
Жорий йил сентябрь ойида маҳбуснинг қариндошлари Бош прокуратура ва Ички ишлар вазирлигига суяк сил касаллигининг оғир шакли ташхиси қўйилгани сабабли Мингеловни озод қилиш жараёнини бошлаш илтимоси билан мурожаат қилишган. Улар Туркманистон Жиноят кодексининг 76-моддаси («Оғир касаллик туфайли жазодан озод қилиш») ва Жиноят-ижроия кодексининг 166-моддаси («Жазодан озод қилиш асослари»» ни келтирганлар, бу ерда «оғир касаллик» 6-моддада кўрсатилган.
Фаолнинг ҳимояси, шунингдек, юқорида айтиб ўтилган моддалар қўлланиладиган касалликлар рўйхатини тасдиқловчи 2017 йил 11 майдаги президент фармонига таянган. 2024 йил ёзида Соғлиқни сақлаш вазирлиги комиссияси Мингеловнинг чап ва ўнг тиззаларида сил касаллиги борлигини тасдиқлаган ва бу касалликни мамлакат ичида даволашнинг иложи йўқлигини таъкидлаган.
Ариза берувчилар 20 октабр куни Жазони ижро этиш департаментидан умумий жавоб олишган. Хатда айтилишича, расмийлар «барча далилларни ўрганиб чиқиб», бу «амалдаги Туркманистон қонунчилиги талабларига жавоб бермайди» деган хулосага келишган.
Аввалроқ, маҳбусга қўйилган ташхис Туркманистоннинг Бирлашган Миллатлар Ташкилотидаги (БМТ) доимий вакили Вепа Ходжиев томонидан оммага эълон қилинган эди. У миллий қонунчилик оғир патологияларга эга маҳбусларни суд қарори билан озод қилишни назарда тутишини тасдиқлаган. Суд жараёни назорат комиссияси ва жазони ижро этиш органининг қўшма хулосаси олинганидан сўнг бошланади.
50 ёшли Мансур Мингелов ҳозирда MR-B/15 қамоқхона касалхонасида сақланмоқда.
ℹ️ Мари вилоятида яшовчи Мансур Мингелов ёшлигиданоқ ўзи мансуб бўлган этник озчилик — балужлар ҳуқуқларини ҳимоя қилиб келган. У биринчи марта 2012 йил июнь ойида гиёҳванд моддалар контрабандасида гумонланиб ҳибсга олинган. Ҳибсга олиш пайтида унинг оёғи синган.
Озодликка чиққандан сўнг Мингелов қийноқлар ва балуж халқига нисбатан қўпол зўравонлик ҳолатлари, жумладан, электрошок, калтаклаш ва бошқа қийноқлар қўллангани ҳақида шикоят қилган. Кейинроқ у қайта ҳибсга олинган ва бир қатор жиноятлар, жумладан, наркотик моддалар контрабандаси ва порнография тарқатишда айбланган. 2012 йили у 22 йиллик қамоқ жазосига ҳукм қилинган. Ҳуқуқ ҳимоячилари буни сохта айбловлар деб аташган.
2018 йили Мингеловга сил касаллиги ташхиси қўйилган, у оёқ остеомиелитлари билан асоратланган. Қамоқхона касалхонасига ўтказилганига қарамай, оёқ-қўлини кесишдан бош тортгани учун уни мунтазам равишда қаттиқ режимли қамоқхонага қайтариш билан таҳдид қилишган. 2024 йили Туркманистон Ички ишлар вазирлигининг тиббий комиссияси ташхисни тасдиқлаган ва мамлакатда бу касаллик даволанмаслигини, аммо ампутацияга зарурат йўқлигини маълум қилган. Маҳкум оёғини чет элда сақлаб қолиш мумкин бўлган.
