cpc.ru сайти фотосурати
Каспий қувурлари консорциумига (КҚК) қилинган ҳужумлар натижасида Қозоғистоннинг нефть қазиб олишдаги йўқотишлари 480 минг тоннани ташкил этди. Бу ҳақда мамлакат Энергетика вазири Ерлан Аккенженов маълум қилди, деб хабар беради Vласть.kz.
Шу билан бирга, мулозим йил якунига кўра нефть қазиб олиш режалари бажарилишига ишонтирди.
Сиёсатшунос Марат Шибутов ўзининг Телеграм каналида нефть нархи бир тонна учун 450 доллар бўлганида Қозоғистон 216 миллион доллар йўқотганини ҳисоблаб чиқди. «Бу тахминан 110 миллиард тенге. Бу жуда катта пул», — деб таъкидлайди у.
КҚК нефть ташиш тизими Каспий минтақасидан нефтни жаҳон бозорига ташишнинг энг катта йўналиши ҳисобланади. 1500 километр узунликдаги магистрал қувур Ғарбий Қозоғистон конларини (Тенгиз, Қорачиғаноқ ва Кашаған) Россиянинг Қора денгизи соҳиллари билан боғлайди, у ерда нефть денгиз терминали орқали танкерларга юкланади.
Бу йил қувур орқали рекорд даражадаги 72 миллион тонна нефтни узатиш режалаштирилган эди, аммо энди режа 68 миллион тоннага қисқартирилди. Энергетика вазирлиги раҳбари Қозоғистон КҚКдан воз кечмаслигини таъкидлади, чунки бу йўналишга «муқобил вариант» йўқ.
Ноябрь ойи охирида Украина дрони ҳужумидан КҚК юклаш инфратузилмасининг асосий қисми зарар кўрди ва бу тизим орқали экспорт камайишига олиб келди. Ҳозирда Новороссийск портидаги учта лангар блокидан фақат биттаси — ВПУ-1 ишламоқда. ВПУ-2 зарба натижасида жиддий шикастланган. Аккенженов хабар беришича, мутахассислар таъмирлаш имкониятини баҳолаш учун унинг сузиш қобилиятини тиклашмоқда. Вазирнинг сўзларига кўра, лангарда улкан ёриқ юзага келган.
Ҳужум пайтида яна бир бардошли лангар — ВПУ-3га режали техник хизмати кўрсатилаётган бўлган. Bloomberg маълумотларига кўра, бу 15 декабргача якунланмаслиги мумкин. Тўлиқ экспорт ҳажмини сақлаб қолиш учун Қозоғистонга камида иккита ишлайдиган лангар блоки керак. Шу сабабли, омборларда нефть захиралари тўплана бошлади, деб таъкидлайди агентлик.
