АҚШ ҳукумати Браун университетидаги отишмадан сўнг Green Card дастури — иммиграция лотереясини (DV1) тўхтатишга қарор қилишди. Бу ҳақда АҚШ Ички хавфсизлик вазири Кристи Ноэм маълум қилди.
Бундай қарорга 14 декабрь куни Браун университетида отишма содир этган шахс сабаб бўлган. Маълум бўлишича, Клаудио Мануэль Невес Валенте 2017 йили виза лотереяси орқали мамлакатга кириб келган ва кейинчалик доимий резидент мақомини (грин-карта) олган. Университетдаги отишма икки кишининг ўлимига сабаб бўлди, улардан бири ўзбекистонлик талаба Муҳаммадазиз Умурзоқов бўлган.
«Президент Трампнинг кўрсатмасига асосан мен дарҳол USCISга (АҚШ Фуқаролик ва иммиграция хизматлари – «Фарғона» изоҳи) DV1 дастурини тўхтатиб қўйишни буюраман, токи бирорта америкалик бу ҳалокатли дастурдан зарар кўрмасин», — деди Ноэм.
Унинг эслатишича, Трамп биринчи муддати давомида Нью-Йорк шаҳрида ўзбекистонлик иммигрант томонидан содир этилган террористик ҳужумдан сўнг Green Card лотереясини тўхтатишни хоҳлаган. Гап шундаки, Сайфулло Соипов 2017 йил 31 октабр куни Нью-Йорк шаҳрининг Гудзон дарёси бўйидаги махсус велосипед йўлагида пикапни юқори тезликда бошқариб, йўлидаги барча одамларни босиб ўтган. Саккиз киши ҳалок бўлганди ва ўндан ортиқ киши жароҳат олганди. Суд Соиповни кетма-кет саккизта умрбод қамоқ жазоси, яна иккитасига бир вақтнинг ўзида ва 260 йилга озодликдан маҳрум қилиш жазосига ҳукм қилганди.
ℹ️ Green Card лотереяси АҚШ Давлат департаменти томонидан 1990 йилдан йўлга қўйилган ва ҳар йили ўйин ўтказилади. Дунё бўйлаб барча мамлакатлар фуқаролари иштирок этиш ҳуқуқига эга, фақат олдинги беш йил ичида 50 000 дан ортиқ фуқаролари Қўшма Штатларга кўчиб ўтган мамлакатлар бундан мустасно. Марказий Осиё мамлакатлари аҳолиси лотереяда фаол иштирок этиб, иштирокчилар ва ғолиблар сони бўйича сезиларли натижаларни кўрсатган. Ўзбекистон бу борада нафақат минтақада, балки глобал миқёсда ҳам етакчилардан бири ҳисобланади. Жумладан, 2025 йил май ойида эълон қилинган ўйин натижаларига кўра, Ўзбекистон 5564 нафар танланган ғолиб билан мамлакатлар рўйхатида етакчилик қилди. Бу кўрсаткич Жазоир (5526) ва Россия (5519) каби энг яқин рақобатчиларидан ҳам юқори.
Жорий йилнинг сентябрь ойида АҚШ ҳукумати лотереяда иштирок этиш учун 1 долларлик тўловни жорий қилди. Тўпланган маблағлар иштирокчилар маълумотларини қайта ишлаш ва ҳимоя қилиш, ғолибларни автоматик равишда танлаш ва дастурнинг техник инфратузилмаси йиллик харажатларини қоплаш учун сарфланади.
Одатда, аризалар октябрь ойида тўпланарди, аммо бу йил потенциал иштирокчилар дастурнинг ишга туширилишидан бебаҳра бўлишди.
