iz.ru сайти фотосурати
Буюк Британия Россияга қарши санкциялар рўйхатини янгилади ва унга Ўзбекистондан тўртта ва Қирғизистондан битта компанияни киритди. Ушбу субъектлар Россия билан иқтисодий ҳамкорликда гумон қилинмоқда ва шунинг учун 18 декабрдан бошлаб Лондон уларга активларни музлатишдан ташқари молиявий чекловларни ҳам қўллайди, дейилади Буюк Британия Ғазначилик ҳужжатларида.
Санкциялар рўйхатига Ўзбекистонда рўйхатдан ўтган қўйидаги компаниялар киритилди:
✅ Фарғона кимё заводи;
✅ Gelion Business Trade МЧЖ (Тошкент);
✅ Chemistry International қўшма корхонаси МЧЖ (Навоий);
✅ Raw Materials Cellulose МЧЖ (Жиззах).
Британия расмийларига кўра, ушбу ташкилотларнинг барчаси Россиянинг Украинада ўтказаётган махсус ҳарбий операцияда фойдаланилаётган товарлар ёки технологияларни қандайдир тарзда Россияга етказиб беришда гумон қилинмоқда. Қўшимча маълумотлар берилмаган.
Янгиланган рўйхатга Бишкекда рўйхатдан ўтган «Кифико» компанияси киритилган. Лондон ушбу МЧЖни Россия ҳукумати учун стратегик аҳамиятга эга бўлган молия секторида бизнес юритиш орқали Россия ҳукуматини қўллаб-қувватлашда айблайди. Рўйхатда «Кифико» компаниясининг илгари нафақат Буюк Британия, балки АҚШ ва Европа Иттифоқи томонидан ҳам санкциялар қўлланилган А7 компанияси билан боғлиқлиги ҳақида маълумотлар келтирилган.
Марказий Осиё давлатлари компанияларидан ташқари, янгиланган санкциялар рўйхатига Россия ва Бирлашган Араб Амирликлари ташкилотлари ҳам киритилган.
Бундан ташқари, жисмоний шахсларга нисбатан ҳам санкциялар қўлланилган. Ушбу рўйхатга Буюк Британия Молия вазирлиги маълумотларига кўра, Ўзбекистон, Исроил ва Россия фуқаролигига эга бўлган бизнесмен Рустам Мўминов киритилган. Украина илгари мазкур бизнесменга чкарши екловлар қўллаганди. Ўшанда Мўминов Фарғона кимё заводига эгалик қилувчи компаниянинг асосчиси экани аниқланган эди.
