shutterstock.com сайти фотосурати
Ўзбекистоннинг 38 ёшли фуқароси С.Х. хорижий давлат армиясида хизмат қилгани учун уч йилга озодликдан маҳрум қилинди. Бу ҳақда UzNews.uz суд ҳукмига таяниб хабар берди.
Ҳукм Андижон вилоятининг жинояти ишлари бўйича Бўстон тумани суди томонидан чиқарилди. С.Х. Ўзбекистон Жиноят кодексининг 154-моддаси («Ёлланиш») 1-қисми бўйича айбдор деб топилди.
Иш материалларига кўра, шу йилнинг апрель ойида С.Х. Россияга ишлаш учун кетган. Икки ойдан кейин полиция уни ҳужжатлари йўқлиги учун ҳибсга олган. Судланувчининг сўзларига кўра, полиция бўлимида ундан мазмуни тушунилмаган ҳужжатларга имзо чекиш сўралган. Кейинчалик маълум бўлишича, бу Россия томонидан Украинада эълон қилинган махсус ҳарбий операцияда (МҲО) иштирок этишни назарда тутувчи ҳарбий хизмат шартномаси бўлган.
Шартнома имзоланганидан сўнг, андижонлик эркак Донецкка жўнатилган ва у ерда рус қўшинлари учун озиқ-овқат захираларини тушириш билан шуғулланган. Бироз вақт ўтгач, у Луганскка кўчирилган.
Куз кунларининг бирида андижонлик жанговар гранатанинг устки қисмини демонтаж қилишга уринган, натижада портлаш содир бўлган. С.Х. кичкина бармоғини йўқотган ва билагидан жароҳатлаган. У касалхонага ётқизилган. Бироқ, у касалхонадан қочиб, Ўзбекистонга қайтиб келган. Хабарларга кўра, Россия армиясида хизмат қилган пайтида у 800 000 рубль миқдорида тўлов олган.
ℹ️ «Фарғона» Ўзбекистонда ёлланиш моддаси бўйича жиноий ишлар қўзғатилаётгани ҳақида бир неча бор ёзган. Айрим судланганлар қамоқ жазосини олишган, айримлари озодликни чеклаш жазосига ҳукм қилинган. Шу йилнинг ноябрь ойида Давлат хавфсизлик хизмати 2022 йилдан бери Ўзбекистонда фуқароларнинг хориждаги қуролли можароларда иштирок этганига доир 338 та жиноий иш қўзғатилганини хабар қилди.
