Ҳужум пайти. Одамлар курсилар остига яширинишган. Видеодан кадр
Истанбулнинг Сариер туманидаги Санта-Мария черковига уюштирилган ҳужум учун икки тожикистонлик ва бир россиялик икки мартадан умрбод қамоқ жазосига ҳукм қилинди ва қўшимча 143 йилга озодликдан маҳрум этилди. Бу ҳақда Т24.сom хабар берди.
Ҳужум 2024 йил 28 январда содир бўлган. Икки ниқобли одам черковга бостириб кириб, одамларга қарата бир нечта бор ўқ узган ва чиқиб кетган. Натижада 52 ёшли Туркия фуқароси Тунчер Жиҳан ҳалок бўлган. Руҳонийнинг сўзларига кўра, агар террорчиларнинг қуролларидан бири панд бермаганда, қурбонлар сони кўпроқ бўлар эди.
«Ислом давлати» (ИД, Россияда тақиқланган) террорчилик гуруҳи ҳужумни бўйнига олган. Тергов давомида 60 дан ортиқ одам ҳибсга олинган.
Ҳужумни Тожикистон фуқароси Амиржон Холиқов ва Россия фуқароси Давид Тандуев амалга оширгани аниқланган. Улар шунингдек, Тожикистон фуқароси бўлмиш «Адам Абу-Даррар Ал-Шишани» кодли Адам Хамирзаев буйруғи билан ҳаракат қилишган.
Уччаласи ҳам Туркия Жиноят кодексининг иккита моддаси бўйича умрбод қамоқ жазосига ҳукм қилинди: «Туркия конституциявий тузумини зўрлик билан ағдаришга уриниш» ва «Оғирлаштирувчи ҳолатдаги қотиллик». Улар шунингдек, «оғирлаштирувчи ҳолатдаги қотилликка уриниш» учун 143 йилдан қамоқ жазосига ҳукм қилинган.
Ушбу ишга алоқадор бўлган яна беш нафар тожикистонлик фуқаро ҳам умрбод қамоқ жазосига ҳукм қилинган. Шамсулло Ражабов, Алишер Раҳимов, Фарруҳ Солиев, Абдулазиз Абдуллаев ва Расул Аҳмаджанов қуйидаги жазоларни олган:
▪️ «Туркия конституциявий тузумини зўрлик билан ағдаришга уриниш» учун 15 йилга озодликдан маҳрум қилиш,
▪️ «Оғирлаштирувчи ҳолатларда қотилликка ёрдам бериш ва уни қўллаб-қувватлаш» учун 15 йилга озодликдан маҳрум қилиш,
▪️ «Оғирлаштирувчи ҳолатларда қотилликка уринишга ёрдам бериш ва уни қўллаб-қувватлаш» учун 71 йил 6 ойга озодликдан маҳрум қилиш.
Уларнинг ҳар бирига жами 101 йил 6 ойга озодликдан маҳрум қилиш жазоси берилган.
Яна икки судланувчи, Исминали Мирзожанов ва Эделхан Инажаев, «қуролли террорчи ташкилотга аъзолик» айблови билан 6 йил 3 ойлик қамоқ жазосига ҳукм қилинган. Судланганларнинг барчаси ИШИД аъзолари бўлган.
Ўттиз бир нафар судланувчи оқланган.
