rg.ru сайти фотосурати
Покистон Мудофаа вазири Хаважа Асиф ўз мамлакатинг «сабрини тугатганини ва энди Афғонистон билан очиқчасига уруш бошланганини» эълон қилди. Шунингдек, у қўшни давлатни бошқараётган толибларни* «терроризм экспортчиси»га айланиб қолганликда айблади. Вазир ўз баёнотларини Х ижтимоий тармоғида маълум қилди.
Мудофаа вазири НАТО кучлари Афғонистондан чиқиб кетганидан сўнг, «Толибон» халқ манфаатларига эътибор қаратиши ва минтақада тинчликни таъминлаши кутилганини ёзади. Аммо бунинг ўрнига, Асиф таъкидлашича, радикал ҳаракат «Ҳиндистон прокси»сига айланган — бутун дунёдан жангариларни тўплаб, терроризмни экспорт қила бошлаган. Бундан ташқари, толиблар ўз мамлакати аҳолисини асосий инсон ҳуқуқларидан маҳрум қилишган, жумладан, Ислом томонидан кафолатланган аёллар ҳуқуқларини поймол қилишган.
Расмийнинг сўзларига кўра, Покистон қўшни мамлакатда тирикчилик қилаётган миллионлаб афғон қочқинларини қабул қилиш орқали нормал ҳаётни сақлаб қолиш учун барча саъй-ҳаракатларни амалга оширган. Бироқ, толибларнинг навбатдаги ҳужумидан сўнг сабр косаси тўлган.
«Энди очиқчасига уруш бошланди», — деди Мудофаа вазири.
Исломобод Афғонистон ҳукуматини ўз ҳудудида афғон толибларига мафкуравий жиҳатдан яқин бўлган «Теҳрик-и-Толибон Покистон» (ТТП)* гуруҳи жангариларини бошпана берганликда бир неча бор айблаган. Бир неча кун олдин Покистон ҳарбий ҳаво кучлари чегара вилоятларида ҳаво ҳужумларини амалга ошириб, террорчилар позицияларини йўқ қилган. Бунга жавобан толиблар икки мамлакат ўртасида тан олинмаган чегара — Дюранд чизиғи бўйлаб операцияларни бошлаган. ОАВда ҳар икки томондан юзлаб ҳарбийлар қурбон бўлгани ҳақида хабарлар пайдо бўлди.
Можаронинг кучайиши Покистон ҳаво кучларининг навбатдаги ҳаво ҳужумига олиб келди. Ҳужумда Афғонистон пойтахти Кобул, шунингдек, Қандаҳор ва Пактия вилоятларида шаҳарлар нишонга олинди. Исломобод самолётлар ҳарбий иншоотларни, жумладан, жангарилар штаб-квартиралари ва ўқ-дори омборларини бомбардимон қилганини даъво қилмоқда. Афғон расмийлари тинч аҳоли орасида қурбонлар бўлганини айтиб, Покистон режимини халқаро судда жавобгарликка тортишга чақирмоқдалар.
Бундан ташқари, «Толибон» вакили Забиуллоҳ Мужоҳид Афғонистон террорчиларга бошпана бермаганини ва ТТП Покистоннинг ички муаммоси эканини яна бир бор таъкидлади. Унинг қўшимча қилишича, толиблар ҳаво ҳужумларига куч билан жавоб беришади.
27 февраль куни эрталаб Афғонистон Мудофаа вазирлиги ҳаво ҳужумига жавобан чегара операцияси якунланганини эълон қилди. Вазирлик маълумотларига кўра, толиблар иккита штаб ва 19 та душман постини, шунингдек, юзлаб енгил ва оғир қуролларни қўлга киритишган.
Покистон давлат оммавий ахборот воситалари ўз навбатида Исломобод ҳам жавоб қайтарганини ва мамлакат армияси Афғонистондаги бир нечта постларни эгаллаб олганини ва «ҳал қилувчи ғалабага» эришганини хабар қилишди.
Афғонистон ва Покистон ўртасидаги ҳарбий ҳаракатлар қайта бошланганидан сўнг кўплаб сиёсатчилар иккала томонни кескинликни тўхтатишга чақиришди. Хусусан, Бирлашган Миллатлар Ташкилоти Бош котиби Антонио Гутерриш Кобул ва Исломободга муаммоларни дипломатик йўллар билан ҳал қилишни таклиф қилди ва шунингдек, чегарадош давлатлар расмийлари халқаро ҳуқуқ бўйича ўз мажбуриятларини бажариши ва тинч аҳоли ҳимоясини таъминлаши кераклигини эслатди.
*Кўпгина мамлакатларда террорчи сифатида тан олинган ва тақиқланган ташкилот.
