Европа Иттифоқи Россияга қарши 21-чи санкциялар пакети бўйича таклифларни тақдим этди, бу Қозоғистон, Қирғизистон ва бошқа бир қатор мамлакатлар компанияларига қарши экспортни назорат қилиш чораларини ўз ичига олиши мумкин. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Кая Каллас ўзининг Х аккаунтида маълум қилди.
«Қадамма-қадам, биз Россия ҳарбий иқтисодиёти пойдеворини бузмоқдамиз. Бугун биз Россияга қарши 21-чи санкциялар пакети бўйича таклифларимизни тақдим этамиз», — деб ёзган Каллас.
Унинг сўзларига кўра, пакет Россия нефтининг нархини вақтинча музлатиш, шунингдек, Москва даромад олиш ва Европа Иттифоқи санкцияларини четлаб ўтиш учун фойдаланаётган субъектларга қарши чораларни ўз ичига олади.
Каллас янги чекловлар учинчи мамлакатлардаги банклар, қурол ишлаб чиқарувчилар, нефть савдогарлари, нефтни қайта ишлаш заводлари ва криптовалюта операторларига қаратилганлигини таъкидлайди. Бундан ташқари, Европа Иттифоқи ўзининг санкциялар рўйхатига Брюсселнинг фикрича, Россия ҳарбий-саноат комплексини қўллаб-қувватлайдиган компанияларни қўшиш ниятида.
Европа дипломатияси раҳбарининг сўзларига кўра, янги рўйхатлар дрон ишлаб чиқариш билан боғлиқ 30 дан ортиқ нарсаларни, шунингдек, Хитой, Туркия, Қирғизистон, Қозоғистон, БАА ва Ҳиндистонда жойлашган 50 та компанияга қарши экспорт назоратини қамраб олади. Каллас Қозоғистон ва Қирғизистон компаниялари номларини айтмаган.
У шунингдек, Европа Иттифоқи «Россиянинг ишлаб чиқариш қувватини янада бузиш» учун қўшимча материаллар ва технологиялар, жумладан, никел кукунлари, металлар ва юқори самарали қотишмалар экспортини чеклаш ниятида эканини айтди. Бундан ташқари, Брюссел автомобил эҳтиёт қисмлари, айрим қимматбаҳо металл рудалари ва кимёвий моддалар каби янги товарлар импортини чеклашни таклиф қилади.
Пакетдаги алоҳида чора сифатида Каллас Россия қуролли кучларининг амалдаги ва собиқ аъзолари ва унга алоқадор прокси гуруҳлари учун «кенг қамровли виза тақиқларини» эслатиб ўтди. Унинг сўзларига кўра, «Европа эшиги бундай шахслар учун очиқ бўлмаслиги керак».
Санкция таклифлари Европа Иттифоқига аъзо давлатлар томонидан кўриб чиқилиши ва тасдиқланиши лозим. Аввалроқ, 11 май куни 21-пакет ҳақидаги саволга жавоб бераркан, Каллас Европа Иттифоқи Россия ҳарбий-саноат комплексини нишонга олиш ниятида эканини ва Россияни урушни молиялаштириш воситаларидан маҳрум қилиши мумкин бўлган чоралар аниқлангани сабабли санкцияларни «мунтазам равишда» кўриб чиқаётганини таъкидлаганди.
