cpc.ru сайти фотосурати
Қора денгиздаги Каспий қувур консорциуми (КҚК) денгиз терминалига нефть юклаш учун йўл олган Nordic Zenith нефть танкери 17 июлга ўтар кечаси ҳужумга учради. Бу ҳақда КҚК вакили РИА Новости агентлигига маълум қилди.
Консорциум маълумотига кўра, ҳужум оқибатида кема бортида ёнғин чиққан.
«Танкер КҚК терминалига юк ортиш учун етиб келиши кераклигини тасдиқлаймиз. Кемага икки марта ҳужум қилингач, унинг бортида ёнғин чиқди ва фавқулодда ёрдам сигнали берилди. Экипажнинг 13 нафар аъзоси КҚК кемалари томонидан эвакуация қилинди, яна 9 нафари эса ўз хоҳишига кўра кемада қолди», — дейилади компания хабарида.
Ёнғин экипаж кучлари томонидан ўчирилди.
Бироқ, ҳужум оқибатида танкер КҚК терминалида нефть юклаш учун яроқсиз ҳолга келган.
MarineTraffic хизмати маълумотларига кўра, Nordic Zenith танкери Либерия байроғи остида қатнайди.
Бу Қора денгиз орқали Қозоғистон нефтини ташувчи танкерларга қилинган биринчи ҳужум эмас. Январь ойида дронлар икки кемага зарар етказган эди. Уларнинг бири Американинг Chevron компанияси, иккинчиси эса «ҚазМунайГаз»нинг шўъба корхонаси томонидан чартер асосида ижарага олинган.
Бундан ташқари, июль ойи бошида ҳам Chevron томонидан чартер қилинган ва КҚК денгиз терминалига юк ортиш учун йўл олган Yasa Polaris танкери учувчисиз учиш аппарати ҳужумига учраган. Кейинчалик кема жиддий шикастланмагани маълум қилинган.
Каспий қувур консорциуми Каспий минтақасидан жаҳон бозорларига нефть ташиш бўйича энг йирик йўналишни бошқаради. Қозоғистон нефть экспортининг 80 фоиздан ортиғи КҚК тизими орқали амалга оширилади. Узунлиги тахминан 1,5 минг километр бўлган қувур Ғарбий Қозоғистондаги нефть конларини Қора денгиз соҳилидаги денгиз терминали билан боғлайди. У ердан нефть танкерларга юкланади. КҚК акциядорлари қаторига Россия (31 фоиз), Қозоғистон (20,75 фоиз), Chevron (15 фоиз) ҳамда хусусий компаниялар киради.
