Қозоғистон президенти Қосим-Жомарт Тўқаев 25 сентябрни Каспий денгизида ҳалок бўлган ҳарбийлар хотирасига умуммиллий мотам куни деб эълон қилди. Давлат раҳбарининг тегишли фармойишини Оқўрда эълон қилди.
Аввалроқ Тўқаев ҳарбий хизматчиларнинг ҳалок бўлгани муносабати билан ҳамдардлик билдирганди ва ҳукумат комиссиясига уларнинг оилаларига ёрдам кўрсатиш учун барча зарур чораларни кўришни топширганди.
Ҳодиса 24 сентябрь куни Каспий денгизининг Қозоғистон секторида ҳарбий-денгиз кучларининг «Хазар қорғаны-2026» машғулотлари вақтида содир бўлган. Республика Мудофаа вазирлиги маълумотига кўра, об-ҳавонинг кескин ёмонлашиши ва кучли шамол туфайли ўқув-жанговар вазифани бажараётган бир гуруҳ ҳарбий хизматчилар денгизга оқиб кетган. Ҳозирга қадар ҳокимият вакиллари тўққиз киши ҳалок бўлганини маълум қилди. Ulysmedia.kz мухбири маълумотига кўра, сувдан 12 нафар ҳарбийнинг жасади олиб чиқилган.
Жами 19 киши денгизда қолган, улардан уч нафари қутқарилган, қолганларни қидириш ишлари давом этмоқда.
Нашр, шунингдек, ҳалок бўлган ҳарбий хизматчиларнинг дастлабки рўйхатини ҳам эълон қилди. Унда Сержан Аяпберген, Асет Жанабай, Алмас Кобенов, О. Мухтарули, Женис Темиргалиев, Азамат Мадихан, Ақилбек Тўлеген ва Омирбек Омирзак исмлари келтирилган.
Мудофаа вазирлиги маълумотига кўра, машғулотларда 500 нафардан ортиқ киши иштирок этган. Улар бўлинмаларнинг ўзаро ҳамкорлигини ва ўқув-жанговар вазифаларни бажаришни машқ қилишлари керак эди. Манёврларга Қозоғистон Қуролли Кучлари Ҳарбий-денгиз кучлари бош қўмондони, 1-даражали капитан Қанат Ниёзбеков раҳбарлик қилган.
Ҳарбий хизматчиларнинг ҳалок бўлиши факти юзасидан жиноий иш қўзғатилган, тезкор-тергов гуруҳи тузилган. Ҳодиса ҳолатларини Мудофаа вазири Даурен Косанов бошчилигидаги вазирлик комиссияси ҳам ўрганади. Комиссия Манғистау вилоятига етиб борган. Айни пайтда Bes.media нашри ёзишича, 24 сентябрь куни «Қазгидромет» ҳудудда шамол тезлиги секундига 20 метргача етишини прогноз қилган.
Бу Қозоғистон ҳарбийлари билан боғлиқ бундай ҳодисанинг биринчи ҳолати эмас. 2015 йилда ҳам шунга ўхшаш воқеа содир бўлган: Каспийдаги машғулотлар вақтида тўртта БТР-80 чўкиб кетган ва тўрт нафар ҳарбий хизматчи ҳалок бўлган. Тергов натижаларига кўра, бир неча офицер қамоқ жазосига ҳукм қилинган.
