Иаков Воронцов суд мажлисида. bureau.kz сйти фотосурати
Қозоғистонда тўрт йиллик қамоқ жазосига ҳукм қилинган Россия православ черковининг собиқ руҳонийси Иаков Воронцов Олмаотадаги тергов ҳибсхонасидан йўллаган мактубида ўзини айбсиз деб ҳисоблашини маълум қилди. 9 октябрь куни, ҳукм чиқарилганидан икки кун ўтиб ёзилган мактуб матнини унинг дўсти Геният Исин Facebook саҳифасида эълон қилди.
«Иложи бўлса, ҳаммага айбсиз эканимни етказ. Мен таслим бўлмадим ва айбимни тан олмадим. Менга ўзим қилмаган ишим учун иккиюзламачилик билан тавба қилишни таклиф этишди. Шунда шартли жазо беришарди. Аммо мен бу гуноҳни ўз зиммамга олмадим», — деб ёзади Воронцов.
Исиннинг сўзларига кўра, собиқ руҳоний сўнгги лаҳзагача озодликка чиқишига умид қилган, чунки «судда айблов бутунлай барбод бўлган». У суд ҳукмини адолатсиз ва шафқатсиз деб ҳисоблайди ҳамда унинг устидан апелляция шикояти беришни режалаштирган.
Иаков Воронцов мактубидан парча. Суратни «Фарғона» нашрига Геният Исин тақдим этди
Исин Воронцовнинг сўзларига таяниб, у очлик эълон қилишни тўхтатгани ва энди оз-оздан овқатлана бошлаганини маълум қилган. У 22 кун давомида камерада ёлғиз сақланган, энди эса унинг ёнига бошқа маҳбус жойлаштирилган.
7 октябрь куни Олмаотанинг Медеу туманидаги 2-сонли суд Воронцовни сотиш мақсадисиз психотроп модда аналоги бўлган гиёҳвандлик воситасини қонунга хилоф равишда ўта йирик миқдорда сотиб олиш ва сақлашда айбдор деб топди (Қозоғистон Жиноят кодексининг 296-моддаси 4-қисми). «Фарғона» нашри ёзишича, гап унинг уйида ўтказилган тинтув пайтида топилган 2,44 грамм меткатинон аналоги ҳақида бормоқда.
Суд унга олти йиллик қамоқ жазосини тайинлаган, бироқ янги Конституция қабул қилиниши муносабати билан эълон қилинган амнистия туфайли жазо муддати тўрт йилга қисқартирилган. Адвокат Ғалим Нурпеисов айблов исботланмаган деб ҳисоблайди: унинг сўзларига кўра, тергов Воронцовнинг ушбу гиёҳванд моддага эгалик қилганини ҳам, уни қаерда ва қачон сотиб олганини ҳам исботлай олмаган.
Воронцов, асли исми Владимир, Олмаота шаҳрида туғилган ва Россия православ черковининг Остона ва Олмаота епархиясида иеромонах бўлиб хизмат қилган. У Россиянинг Украинага бостириб киришини ва Москва патриархати раҳбарияти сиёсатини очиқ қоралаганидан сўнг танилган. Кейинчалик у руҳонийлик унвонидан маҳрум қилинган. Қозоғистонда Москва патриархатидан мустақил православ жамоасини рўйхатдан ўтказишга бўлган уринишлари эса мамлакат Адлия вазирлиги томонидан икки марта рад этилган.
