Калифорния штатининг Жанубий округи федерал суди АҚШ Давлат департаментига 2025 йил охирида президент Дональд Трамп қарори билан тўхтатилган Green Card лотереяси ўйинларини қайта тиклашни буюрди. Бу ҳақда Forbes.kz суднинг тегишли қарорига таяниб хабар берди.
Шу тариқа, АҚШ Давлат котиби Марко Рубиога қарши даъво киритган Red Eagle Law юридик фирмасининг илтимосномаси қаноатлантирилди.
Дастлаб суд лотерея учун масъул идораларга жорий йилнинг 18 октябрида иштирокчиларни рўйхатга олишни бошлаш ва бу жараённи 30 кун ичида якунлашни буюрган эди. Яъни 19 ноябрга қадар Green Card олишга даъвогар бўлган ғолиблар рўйхати эълон қилиниши керак эди. Бироқ, кейинчалик даъвогар ва жавобгар судядан муддатларни икки ҳафтага суришни биргаликда сўради.
Энди Давлат департаменти иштирокчиларни рўйхатга олишни кечи билан 1 ноябрга қадар бошлаши, АҚШга кириш ҳуқуқини қўлга киритган «омадлилар»ни эса 3 декабрга қадар эълон қилиши керак.
Шу билан бирга, Калифорния судининг қарори лотерея бутунлай тикланганини англатмаслиги таъкидланмоқда, чунки Трамп маъмурияти ушбу қарор устидан шикоят бериши мумкин. Бироқ, ҳозирча Оқ уй ҳеч қандай апелляция шикоятини бермаган.
Виза ўйинларини ўтказиш дастури ўтган йилнинг декабрь ойида Браун университетида содир бўлган отишмадан сўнг тўхтатилган эди. Ҳодиса оқибатида икки киши, жумладан, ўзбекистонлик талаба Муҳаммад Азиз Умурзоқов ҳалок бўлганди. Маълум бўлишича, университетда ўқ очган португалиялик Клаудио Мануэл Невеш Валенте 2017 йилда айнан виза лотереяси орқали АҚШга кирган ва кейинчалик доимий яшовчи мақомини олган.
ℹ️ Green Card лотереяси АҚШ Давлат департаменти томонидан 1990 йилда йўлга қўйилган ва ҳар йили ўтказиб келинган. Унда сўнгги беш йил давомида АҚШга 50 мингдан ортиқ киши иммиграция қилган мамлакатлар фуқароларидан ташқари, дунёнинг барча мамлакатлари фуқаролари иштирок этиши мумкин эди. Дастур ҳар йили 55 мингтагача виза ажратишни назарда тутади. Бундай ҳужжат соҳиблари АҚШда доимий яшаш, қонуний ишлаш ёки бизнес очиш, шунингдек, келажакда Америка фуқаролигини олиш учун ариза бериш ҳуқуқига эга бўлади.
Марказий Осиё мамлакатлари аҳолиси лотереяда фаол иштирок этиб, иштирокчилар ва ғолиблар сони бўйича юқори натижаларни кўрсатиб келган. Бу борада нафақат минтақа, балки дунё миқёсида ҳам етакчилардан бири — Ўзбекистон бўлган. Жумладан, 2025 йил май ойида эълон қилинган лотерея натижаларига кўра, Ўзбекистон танлаб олинган ғолиблар сони бўйича мамлакатлар рўйхатида биринчи ўринни эгаллаган — 5564 киши. Бу кўрсаткич энг яқин рақиблар — Жазоир (5526 киши) ва Россия (5519 киши) натижаларидан юқори бўлган.
2025 йил сентябрь ойида АҚШ ҳукумати лотереяда иштирок этиш учун 1 долларлик тўловни жорий этди. Йиғилган маблағлар иштирокчилар маълумотларини қайта ишлаш ва ҳимоя қилиш, ғолибларни автоматик тарзда танлаш ҳамда дастурнинг техник инфратузилмасини қўллаб-қувватлаш билан боғлиқ йиллик харажатларни қоплашга йўналтирилиши керак эди.
