«Ал-Жазира» — «Аркадаг» учрашувидан лавҳа. ОФК фотосурати
Туркманистоннинг «Аркадаг» футбол клуби ОФК Чемпионлар лигаси-2 мусобақасининг жорий мавсумида илк бор мағлубиятга учради. Гуруҳ босқичининг иккинчи турида Туркманистон жамоаси Абу-Дабида БААнинг «Ал-Жазира» клубига 1:2 ҳисобида ютқазди.
Мезбонлар 55-дақиқада олдинга чиқиб олишди: Малком пенальтини аниқ амалга оширди. 66-дақиқада «Аркадаг» ҳисобни тенглаштирди — Абди Бяшимов гол муаллифи бўлди. Ўйин дуранг билан якунланадигандек кўринган бир пайтда, қўшиб берилган олтинчи дақиқада Нермин Муйкич бош билан зарба бериб, «Ал-Жазира»га ғалаба келтирди.
«B» гуруҳининг параллел учрашувида Баҳрайннинг «Ал-Муҳаррақ» клуби Эроннинг «Гол Гоҳар» жамоасини 2:0 ҳисобида мағлуб этди. Голларни 48-дақиқада пенальтини аниқ амалга оширган Артур Резенде ва қўшиб берилган вақтда рақиб дарвозасини ишғол қилган Факундо Тобарес киритди.
Икки турдан кейин «Ал-Жазира» тўрт очко билан гуруҳ пешқадами бўлиб турибди. «Аркадаг» ва «Ал-Муҳаррақ» ҳисобида учтадан очко бор, «Гол Гоҳар» эса бир очко тўплаган.
«Аркадаг» кейинги учрашувини 28 октябрь куни «Гол Гоҳар»га қарши ўтказади. Учрашув Тожикистоннинг Ҳисор шаҳридаги Марказий стадионда бўлиб ўтади.
