Ўзбекистон ва Туркия савдо имтиёзларини кенгайтириш, божхона маълумотларини алмашиш, фуқароларнинг ижтимоий ҳуқуқларини ҳимоя қилиш ҳамда Бизнесни қўллаб-қувватлаш бўйича юқори даражадаги кенгаш тузишни назарда тутувчи бешта ҳужжатни имзолади. Ҳужжатлар 29 октябрь куни Анқарада Ўзбекистон президенти Шавкат Мирзиёев ва Туркия президенти Режеп Таййип Эрдоғаннинг музокараларидан сўнг имзоланди. Бу ҳақда Ўзбекистон раҳбари матбуот хизмати хабар берди.
Кенгашни ташкил этиш тўғрисидаги битимни президентларнинг ўзлари имзолади. Туркия Савдо вазири Ўмер Болатнинг сўзларига кўра, янги органда Туркия томонига вице-президент Жевдет Йилмаз раҳбарлик қилади. Кенгаш икки мамлакат ўртасида савдо ва инвестицияларни ривожлантиришга кўмаклашиши керак. Spot ёзишича, музокаралар давомида етакчилар ҳукуматлараро комиссиянинг навбатдаги йиғилишига тайёргарлик кўриш ва қўшма лойиҳалар рўйхатини кенгайтиришга ҳам келишиб олган.
Алоҳида протокол преференциал савдо тўғрисидаги битим доирасига кирувчи товарлар рўйхатини кенгайтиради. Яъни бу товарлар икки мамлакат бозорларига имтиёзли шартларда кириш имкониятига эга бўлади. Ҳужжатни Ўзбекистон Инвестициялар, саноат ва савдо вазири Лазиз Қудратов ҳамда Ўмер Болат имзолади. Туркия Савдо вазирлиги аниқлик киритишича, янги шартлар ҳар икки мамлакатда ички тасдиқлаш жараёнлари якунланганидан кейин кучга киради. Вазирлик хабарида қўшимча товарлар рўйхати келтирилмаган.
Яна бир протокол 2022 йил 29 мартда юклар ва транспорт воситалари тўғрисидаги маълумотларни олдиндан алмашиш бўйича эришилган келишувларни янгилайди. Божхона хизматлари ушбу маълумотларни олдиндан электрон шаклда олади. Бу юк ташишни расмийлаштириш жараёнини тезлаштириши ва чегара пунктларида кутиш вақтини қисқартириши керак.
Шунингдек, томонлар ижтимоий таъминот тўғрисидаги ҳукуматлараро битим ва уни қўллаш тартибини белгилайдиган алоҳида маъмурий битим тузди. Ўзбекистон томонининг маълум қилишича, ҳужжатлар икки мамлакат фуқароларининг ижтимоий ҳуқуқларини ҳимоя қилишга қаратилган. Эълон қилинган хабарда нафақа ва бошқа тўловларни тайинлашнинг аниқ шартлари ҳамда ҳужжатларнинг бошқа қоидалари ошкор этилмаган.
Болатнинг маълумотларига кўра, 2025 йилда икки мамлакат ўртасидаги товар айирбошлаш ҳажми 3,1 миллиард долларни ташкил этган. Президентлар уни 5 миллиард долларга етказиш мақсадини қўйди. Вазир, шунингдек, туркиялик пудратчилар Ўзбекистонда умумий қиймати 9,5 миллиард доллардан ортиқ бўлган 333 та лойиҳани амалга оширганини маълум қилди.
Мирзиёев Туркий давлатлар ташкилотининг XIII саммитида иштирок этиш учун Анқарага борди. Икки томонлама учрашувда президентлар савдо, инвестициялар ва маданий-гуманитар алоқаларни муҳокама қилиб, қўшма корхоналар ва авиақатновлар сони ортиб бораётганини қайд этди.
