Эдвард Ртвеладзега бағишланган фильм намойиши. Александр Троицкий фотосурати
Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти бошқаруви аъзоси, Михо музейининг (Япония) махсус ходими Сергей Лаптев академик Эдвард Ртвеладзе хотирасини ҳар йили илмий ўқишлар билан эъзозлашни таклиф қилди.
Олим ушбу ташаббусни Самарқанд шаҳрида «Ўзбекистон маданий мероси – янги Ренессанс пойдевори» VI Халқаро конгресси арафасида ўтказилаётган «Ўзбекистон маданий мероси замонавий илм-фан диққат марказида» мавзусидаги халқаро илмий конференция очилишида сўзлаган нутқида билдирди.
«4 май куни Эдвард Васильевичнинг 80 йиллигини афсус усиз нишонлаганимизда биз унга қандай совға кўпроқ ёқиши ҳақида ўйлагандик. Эдвард Васильевичга берадиган энг яхши нарса биз учун академик Ртвеладзе хотирасига бағишланган илмий ўқишлар бўлиб туюлди. Иложи бўлса, мен бу ўқишларни ҳар йили ўтказишни таклиф қилардим», — деди Лаптев.
Сергей Лаптев Эдварде Ртвеладзега бағишланган китобни тақдим этмоқда. Андрей Кудряшов фотосурати
Бу таклиф қарсаклар билан қўллаб-қувватланди. Шунингдек бўлажак съезд бўлимларидан бирини Эдвард Ртвеладзега бағишлашга қарор қилинди.
Бундан ташқари, Лаптев Эдвард Ртвеладзе ҳақидаги китобни тақдим этди, экранда буюк археолог ҳақидаги фильм намойиш этилди.
Эдвард Васильевич Ртвеладзе 1942 йил 14 майда Боржоми (Грузия) шаҳрида туғилган. Ўрта Осиё ва Шимолий Кавказда юздан ортиқ археологик экспедицияларда қатнашган. Ртвеладзе Александрия Оксиана — Александр Македонскийнинг Бақтрияга қилган ҳарбий юришлари пайтида қурилган шаҳарнинг кашфиёти эгасидир.
Эдуард Ртвеладзе умрининг сўнгги йилларида «Ўзбекистон маданий мероси жаҳон тўпламларида» лойиҳасининг илмий раҳбари бўлиб ишлади. Унинг раҳбарлигида ушбу туркумнинг 50 та расмли китоб-альбомлари нашр этилди. Шунингдек, у «Ўзбекистон меъморий эпиграфияси», «Тарихий кутубхона» ва «Ўзбекистоннинг кўзга кўринган олимлари» туркум китоблари устида ишлаган.
Эдвард Ртвеладзе шу йилнинг 10 февралида вафот этди.
