Аҳоли бандлиги маркази. kazpravda.kz сайти фотосурати
2023 йилнинг 1 июлидан бошлаб Қозоғистоннинг вилоят марказлари ва мегаполисларида 20 та меҳнат мобиллиги марказлари ташкил этилади. Ушбу ислоҳот Республика Ижтимоий кодекси нормаларини амалга ошириш доирасида амалга оширилмоқда, дейилади Меҳнат ва аҳолини ижтимоий муҳофаза қилиш вазирлиги сайтида.
Шу билан бирга, мавжуд бандликка кўмаклашиш марказлари бир хил манзилларда жойлашган ва қозоғистонликларга бир хил турдаги хизматларни кўрсатувчи карьера марказларига айлантирилади.
Ўзгартиришлар бандлик хизматини тизимли ўзгартириш, унинг фаолиятини ва меҳнат воситачилиги бўйича давлат хизматлари сифатини оширишга қаратилган. Хусусан, гап ишни тўлиқ онлайн форматга ўтказиш ҳақида бормоқда, бу эса фуқароларнинг карьера марказлари ходимлари билан алоқаларини минималлаштиради. Бундан ташқари, статистик маълумотларга кўра,
ҳозирда қозоғистонликларнинг қарийб 77 фоизи интернет орқали электрон меҳнат биржаси хизматларига мурожаат қилишмоқда.
Меҳнат мобиллиги марказларининг асосий вазифалари қуйидагилардан иборат бўлади:
✔️ ишчи кучига талаб ва таклифни таҳлил қилиш, прогнозлаш асосида ҳудуднинг меҳнат ресурслари мувозанатини таъминлаш;
✔️ бандликка кўмаклашишнинг ҳудудий хариталарини ишлаб чиқиш ва уларнинг жойларда бажарилишини мувофиқлаштириш;
✔️ барча давлат дастурлари ва хусусий ташаббуслар доирасида аҳоли бандлигини таъминлаш бўйича фаол чора-тадбирларни амалга ошириш ва яратилаётган иш ўринлари мониторингини амалга ошириш;
✔️ аҳоли бандлигини таъминлаш ва кўчириш дастурларини ҳудудий даражада мувофиқлаштириш мақсадида фуқароларнинг ихтиёрий миграциясига кўмаклашиш;
✔️ иш изловчи ва ишсиз сифатида мурожаат қилган шахсларни ҳисобга олиш;
✔️ ҳудудий меҳнат бозори ҳолати тўғрисида аҳолини, маҳаллий ижро этувчи ҳокимият органларини ва ваколатли давлат органини хабардор қилиш.
«Мазкур функцияларни амалга оширишда марказлар ҳудудда фаолият юритаётган барча меҳнат бозори институтларини фаол жалб этади. Бунинг учун уларга фуқароларнинг мақсадли гуруҳларини ишга жойлаштириш билан боғлиқ айрим функцияларни аутсорсингга ўтказиш ҳуқуқи берилади. Ўз навбатида, карьера марказлари шаҳар ва туманлардаги меҳнат мобил марказларининг филиалларига айланади», — дея тушунтирди Меҳнат вазирлиги матбуот котиби Асқар Ниёзов.
