Чорвоқ ГЭСидаги ёдгорлик. gidrproekt.uz сайти фотосурати
Ўзбекистон ҳукумати Тошкент вилоятидаги Чорвоқ ГЭСида сувни ушлаб турувчи тўғоннинг бузилиши эҳтимоли бўйича ҳаракатларни мувофиқлаштириш бўйича машғулотлар ўтказди. Бу ҳақда 20 июнь куни республика Сув хўжалиги вазири Шавкат Ҳамроев журналистларга маълум қилди, деб ёзади Gazeta.uz.
Вазирнинг таъкидлашича, машғулотлар Каховка ГЭСи тўғонининг вайрон бўлиши ва кўплаб аҳоли пунктларини сув босиши фонида ташкил этилган.
Мутахассислар Чорвоқ ГЭСига зарар етказилганда сувнинг Тошкентга неча соатда етиб боришини, қаерда чодирлар ўрнатиш яхшироқ бўлишини, одамларни эвакуация қилишни қандай ташкил этишни, келажакда сув оқимларини қандай бошқаришни ҳисоблаб чиқишган.
Вазирнинг сўзларига кўра, мамлакатдаги барча сув омборлари учун бундай фавқулодда чора-тадбирлар режалари белгиланган.
«Бунда Фавқулодда вазиятлар вазирлиги, Сув хўжалиги вазирлиги, «Ўзбекгидроэнерго» нима қилиши бўйича [аниқ вазифалар] белгиланган. Бу бўйича албатта, давлатимизда чора-тадбирлар амалга оширилиб бориляпти», — деди Шавкат Хамраев.
ℹ️ Эслатиб ўтамиз, бундан уч йил олдин Ўзбекистонда ҳам худди шундай фавқулодда вазият юзага келганди. 2020 йил 1 май куни Сардоба ГЭСи тўғонининг бир қисми ўпирилиб кетганди. Сув тошқини натижасида 100 га яқин кўп қаватли уйлар қисман вайрон бўлган, қарийб 90 минг киши эвакуация қилинган, 50 дан ортиқ киши тан жароҳатлари билан касалхонага ётқизилган, олти киши ҳалок бўлган. Сув оқими туфайли Қозоғистоннинг Туркистон вилоятидаги чегарадош Мактарал туманидаги 10 та аҳоли пункти ҳам сув остида қолган. Бош прокуратурада таъкидланганидек, сув омбори тўғонининг ёриб кетишига объектнинг лойиҳа ҳужжатлари, қурилиши ва эксплуатациясидаги хатолар сабаб бўлган.
ℹ️ Каховка ГЭСининг биринчи агрегати 1955 йили ишга туширилган. Станциянинг қуввати 343 МВт, ўртача йиллик электр энергияси ишлаб чиқариш 1,4 млрд. Сув омборининг сув юзаси майдони 2155 квадрат километрни ташкил қилади.
6 июнга ўтар кечаси Каховка гидроэлектр станциясининг бошқа бинолари ортидан дарвоза клапанлари вайрон қилинган. Бу Днепрнинг қуйи оқимига — Херсон ва Запорожье вилоятлари ҳудудида жойлашган сув омборидан сувнинг назоратсиз оқишига олиб келди. Натижада катта майдон сув остида қолди, ўнлаб одамлар ҳалок бўлди.
ℹ️ Чорвоқ ГЭСи Ўзбекистондаги энг йирик гидроэлектр станция ҳисобланади. У 1972 йили қурилган. 2018 йили модернизация қилинганидан сўнг унинг қуввати 666 МВт, ишлаб чиқариш йилига 2 миллиард кВт/соатдан ошган. Чорвоқ сув омборининг сув ҳавзаси 3200 квадрат километрни ташкил этади.
