oborot.ru сайти фотосурати
Қирғизистон Ташқи ишлар вазирлиги Европарламентнинг 12 июлдаги Марказий Осиёнинг ушбу республикасида ОАВ ва сўз эркинлигига босим ўтказилаётганига оид резолюциясини «нохолис, бирёқлама ва юзаки» деб атади. Расмий баёнот 13 июль куни Ташқи ишлар вазирлиги сайтида эълон қилинди.
Расмийларнинг таъкидлашича, Европарламент Қирғизистон ҳукуматини бир қатор мунозарали қонунларни қайтариб олишга, мустақил журналистларни таъқиб қилишни тўхтатишга ва ҳуқуқ ҳимоячиларини озод қилишга чақирган резолюцияси шошқалоқлик билан қабул қилинган ва мамлакатдаги ишларнинг ҳақиқий ҳолатини акс эттирмайди.
«Афсуски, ушбу резолюцияни тайёрлашда ҳужжат ташаббускорлари Қирғизистон томонига тушунтиришлар ёки қўшимча маълумотлар сўрамаган», — дея таъкидлайди ТИВ.
Дипломатик департамент вакиллари, шунингдек, резолюцияни ишлаб чиқувчилар «Азаттиқ» радиоси (Озодлик радиосининг қирғиз хизмати, РФда хорижий агент сифатида эътироф этилган) атрофидаги вазиятни ҳисобга олмаганини ва бу иш суд орқали ҳал қилингани ва нашр ўз фаолиятини давом эттиришини таъкидладилар. Бундан ташқари, муҳокама қилинаётган қонунлар фақат муҳокама босқичида, жумладан, жамоатчилик фаоллари иштирокида.
Шу билан бирга, Ташқи ишлар вазирлиги Қирғизистон ва Европа Иттифоқи ўртасида ҳамкорлик механизмлари яратилгани, кўплаб масалалар, жумладан инсон ҳуқуқлари бўйича мулоқот олиб борилаётганини ва бундай учрашувлар давом этишини маълум қилди. Хусусан, яқин орада Европарламент халқаро ишлар қўмитаси делегацияси Бишкекка ташриф буюришни режалаштирмоқда.
«Сўз эркинлиги ва инсон ҳуқуқларини ҳимоя қилиш Қирғизистон Республикасининг асосий устувор йўналишларидан биридир. Халқаро ҳамжамиятнинг фаол иштирокчиси ва БМТ Инсон ҳуқуқлари кенгаши аъзоси бўлган Қирғизистон демократия, инсон ҳуқуқлари, қонун устуворлигини мустаҳкамлаш йўлида изчил иш олиб бормоқда ва ўзининг халқаро мажбуриятларини бажаришда давом этмоқда», — дея хулоса қилади ТИВ.
12 июль куни Европарламент «Қирғизистонда оммавий ахборот воситалари ва сўз эркинлигига босим ўтказилаётгани тўғрисида»ги резолюцияни қабул қилди. Ҳужжат муаллифлари республика расмийларини:
👉 «Ёлғон маълумотлар тўғрисида»ги қонунни қайтариб олиш, «хорижий агентлар», «ОАВ», «Болаларни зарарли ахборотдан ҳимоя қилиш тўғрисида»ги қонун лойиҳаларини қайта кўриб чиқишга
👉 Журналистлар Болот Темиров ва Таалайбек Дуишенбиевга нисбатан айбловлар олиб ташланишига;
👉 «Кампиробод иши» бўйича ҳибсга олинган ҳуқуқ ҳимоячилари ва фаолларни озод қилишга;
👉 «Азаттиқ» радиосига босим ўтказишни тўхтатишга;
👉 Фуқаролик жамияти ташкилотлари ва ОАВ вакиллари учун хавфсиз иш муҳитини таъминлашга чақиради.
Эслатиб ўтамиз, Европарламент резолюциясини шарҳлар экан, «Адилет» юридик клиникаси раҳбари Чўлпон Жакупова ҳужжатни «сўнгги огоҳлантириш» деб атади. Унинг фикрича, агар расмийлар Европа Иттифоқи чақириқларини эътиборсиз қолдиришса, улар Қирғизистонни иқтисодий изоляцияга олиб келадиган санкцияларга дучор қилишлари мумкин.
