infopovod.ru сайти фотосурати
Россия Қозоғистоннинг учинчи давлатлар билан муносабатларига аралашмайди, бироқ салбий ташқи таъсирлар Остона билан алоқаларга таъсир қилмаслигига умид билдиради. Бу ҳақда Россия Ташқи ишлар вазирлиги Қосим-Жомарт Тўқаевнинг Қозоғистоннинг Ғарб давлатлари томонидан Россияга нисбатан жорий қилган санкциялар режимига амал қилиш нияти ҳақидаги баёнотига изоҳ бериш сўровига жавобан маълум қилди.
«Биз Қозоғистон Республикасининг учинчи давлатлар билан муносабатларига аралашмаймиз. Шу билан бирга, биз Москва ва Остона ўртасида муносабатларимизни стратегик шериклик ва иттифоқчилик сифатида белгиловчи келишувларнинг бутун мажмуаси мавжудлигидан келиб чиқамиз», — дея ТИВ баёнотидан иқтибос келтиради «Интерфакс».
Ташқи ишлар вазирлиги икки томонлама алоқалар «сиёсат ва хавфсизлик, савдо, сармоя ва бошқа кўплаб соҳаларда конструктив ҳамкорликни» таъминлашини таъкидлади.
«Биз қозоғистонлик ҳамкорларимиз билан яхши қўшничилик муносабатларимизга, жумладан савдо-иқтисодий ҳамкорликка салбий ташқи таъсирларнинг олдини олиш мақсадида самарали ҳамкорликни давом эттирамиз, бу жуда кенг кўламли ва ҳар икки давлат учун катта фойда келтиради ва икки халқ манфаатларига тўлиб жавоб беради барча талабларга тўла жавоб беради», — дейилади ТИВ баёнотида.
Бир кун аввал, 28 сентябрь куни Тўқаев Германия канцлери Олаф Шольц билан музокаралардан сўнг ўтказган матбуот анжуманида Қозоғистон Россияга қарши санкциялар режимига албатта амал қилишини айтганди. Унинг қўшимча қилишича, Германия томони Қозоғистоннинг санкциялар режимини четлаб ўтиши эҳтимолидан хавотирда бўлмаслиги керак.
Кейинчалик, «Казинформ»га берган изоҳида Тўқаев Қозоғистон «Россияга қарши» эмаслигини ва Россия Федерацияси билан тўлиқ ҳамкорликка қатъий содиқ эканини таъкидлади. Президент Қозоғистон санкция чекловларини ҳисобга олишга мажбур эканлигини ва бу борада тегишли халқаро ташкилотлар билан алоқаларни давом эттираётганини тушунтирди.
