Катта Олмаота кўли. nur.kz сайти фотосурати
30 сентябрь куни eQonaq ахборот тизими Қозоғистонга чет элдан миллионинчи сайёҳ келганини қайд этди. Бу ҳақда Kazakh Tourism нашри хабар берди.
Эслатиб ўтамиз, бутун 2022 йил давомида бу мамлакатга 1 миллионга яқин хорижий сайёҳ ташриф буюрган.
Кўпинча сайёҳлар Қозоғистонга Россия ва Ўзбекистондан келади. Биринчи ўнталикка Хитой, Ҳиндистон, Қирғизистон, Туркия, Тожикистон, Германия, Мўғулистон ва АҚШ киради.
Сайёҳлар орасида энг машҳур жойлар орасида 343 минг хорижлик ташриф буюрган Олмаота ва хориждан 174 минг меҳмонни қабул қилган Остона шаҳарлари бор. Биринчи бешликка Олмаота вилояти (62 минг сайёҳ), Атирау (58 минг) ва Манғистау (52 минг) вилоятлари киради.
ℹ️ eQonaq ахборот тизими хорижлик меҳмонларни қайд этиш, туристлар оқимини кузатиш ва миграция назорати учун мўлжалланган. Уни Kazakh Tourism компанияси Туризм ва спорт, Ички ишлар вазирликлари ва Миллий хавфсизлик қўмитаси билан биргаликда ишлаб чиққан.
Аввалроқ Қозоғистон Туризм саноати қўмитаси хорижий мамлакатлардан келган ҳар бир сайёҳ республикага ўртача 1500 доллар даромад келтираётгани ҳақида хабар берган эди.
2023 йил охиригача Қозоғистонга ташриф буюрадиган хорижий сайёҳлар сони 1,4 миллион кишидан ошиши кутилмоқда. Республика ҳукумати 2030 йилга келиб хорижлик ташриф буюрувчилар сонини йилига 4 миллионга етказишни режалаштирган.
