ҚР ТИВ матбуот хизмати фотосурати
Қозоғистон Ҳамаснинг Исроил тинч аҳолига қилган ҳужумларини қоралади. Шу билан бирга, республика Ташқи ишлар вазирлиги Исроилни Ғазо сектори тинч аҳоли орасида кўплаб қурбонларга олиб келадиган номутаносиб куч ишлатишдан тийилишга чақирди.
Вазирлик матбуот хизмати 17 октабрь куни тегишли баёнотни эълон қилди.
«Қозоғистон ҲАМАСнинг Исроил тинч фуқароларига ҳужумларини ва асирларни, шу жумладан хорижликларни гаровга олганини қоралайди. Биз БМТ Бош котиби Антониу Гутерришнинг гаровга олинганларни олдиндан ҳеч қандай шартларсиз зудлик билан озод қилиш ва гуманитар ёрдамдан тўсиқсиз фойдаланишни таъминлаш ҳақидаги чақириғини қўллаб-қувватлаймиз», — дейилади баёнотда.
ТИВ Қосим-Жомарт Тўқаевнинг яқинда Бишкекда бўлиб ўтган МДҲ саммитидаги сўзларидан иқтибос келтиради. Йиғилишда сўзга чиққан Қозоғистон президенти ўнлаб йиллар давомида ҳал этилмаган вазифаларни амалга ошириш учун террорчилик ҳаракатларига ўтиб бўлмаслигини айтган. «Буни ҳеч қандай тарзда оқлаб бўлмайди», — деган у.
«Қозоғистон, шунингдек Исроилни Ғазо секторида кўплаб тинч аҳоли қурбонлари ва фуқаролик инфратузилмаси вайрон бўлишига олиб келадиган номутаносиб куч ишлатишдан тийилишга чақиради. Бундай вазиятда халқаро ҳуқуқ нормаларига риоя қилиш, шунингдек Фаластин халқининг қонуний ҳуқуқларини таъминловчи БМТ Хавфсизлик Кенгашининг тегишли резолюцияларига риоя қилиш ниҳоятда муҳим. Зўравонлик жавобан зўравонлигини келтириб чиқаради ва муқаррар равишда Яқин Шарқ ва бутун дунё учун фожиали оқибатларга олиб келади», — деб таъкидлайди Республика Ташқи ишлар вазирлиги.
Қозоғистон Ғазо сектори аҳолисини эвакуация қилиш бўйича белгиланган муддатни бекор қилишни ва можаро гарови бўлмаслиги керак бўлган тинч аҳолини тўлиқ ҳимоя қилишни талаб қилаётган халқаро ҳамжамият билан бирдамлигини билдиради. Шу муносабат билан Қозоғистон томонларни ҳарбий ҳаракатларни тезроқ тўхтатишга ва «икки халқ учун икки давлат» формуласи асосида минтақанинг барча аҳолиси учун тинчлик, барқарорлик ва хавфсизликка эришиш йўлидаги саъй-ҳаракатларни фаоллаштиришга чақиради», — дея қўшимча қилади ТИВ.
7 октабрь куни Ҳамас жангарилари Исроил ҳудудига йирик ракета ҳужумларини уюштириб, Ғазо сектори билан чегарадош ҳудудларга бостириб кирди. Исроил оғир артиллерия ва самолётлар билан жавоб берди. Бу мамлакат қуролли кучлари анклавни тўсиб, қуруқликда операция ўтказишини эълон қилди.
Аввалроқ Марказий Осиё давлатлари Ташқи ишлар вазирликлари можаро авж олганидан хавотир билдирган эди.
«Азаттиқ» (Россияда хорижий агент сифатида тан олинган Озодлик радиосининг минтақавий хизмати) хабар беришича, Исроил Ташқи ишлар вазирлигининг рус тилидаги Телеграм канали 17 октабрь куни Ҳамас гуруҳи томонидан ҳужум бошланганидан сўнг бедарак йўқолган ёки ўлдирилган хорижликлар жадвалида Қозоғистонни иккинчи бор кўрсатган эди (бу Қозоғистон Ташқи ишлар вазирлиги томонидан рад этилган эди).
Бугунги инфографикада бир Қозоғистон фуқароси ҳалок бўлган, яна бири бедарак йўқолган. «Бизда бундай маълумотлар йўқ, биз буни инкор этамиз. Бу уларнинг хатоси», — деган сешанба куни «Азаттик»га Қозоғистон Ташқи ишлар вазирлиги расмий вакили Айбек Смадияров.
