stanradar.com сайти фотосурати
16 октабрь куни чегарачилар томонидан отиб ташланган «Бўстон» маҳалла фуқаролар йиғинида яшовчи Абдулхай Муқаддасов ва Отабек Йўлдошевларнинг оталари Ўзбекистон расмийларидан воқеани ўрганишни ва фарзандларининг ўлимига сабабчи айбдорларни жазолашни талаб қилишди. «Озодлик» (РФда хорижий агент сифатида тан олинган Озодлик радиосининг ўзбек хизмаи) журналистлари қурбонларнинг ота-оналари ва воқеа гувоҳлари билан суҳбатлашган.
Маҳаллий аҳолининг сўзларига кўра, ўша куни кечқурун 30 ёшли дўстлар Алишер Турсунов ва Сардорбек Собиров чойхонада ошнасининг туғилган кунини нишондан уйга қайтаётган бўлган. Уларнинг машинаси Қирғизистон билан чегарадан унчалик узоқ бўлмаган Фарғона вилоятининг Вуадил қишлоғида жойда жойлашган маҳаллага киритилмай, чегарачилар томонидан тўхтатилган. Ҳарбийлар машинада контрабанда борлигини даъво қилишган. Томонлар ўртасида можаро келиб чиққан.
Кўп ўтмай воқеа жойида патрул тўхтатган дўстларнинг синфдоши Абдулхай Муқаддасов пайдо бўлади. Шундан сўнг жанжалга Собировнинг ўша пайтда постга етиб келган акаси Отабек Йўлдошев аралашади. Йигит отасининг сўзларига кўра, у чегарачи Сардорбекни қандай қилиб ерга йиқитганини ва милтиқнинг қундоги билан юзига урганини кўрган.
«Тўнғич ўғлим укасининг калтакланаётганига чидаб туролмай, аскарни урган. Бу вақтда воқеа жойига ҳарбий қисмдан бир гуруҳ етиб келган. Катта ўғлимни ўша ерда отиб ташлашди. Ўқ унинг жағидан кириб, миясидан чиққан», — дейди марҳумнинг отаси Баҳодир Йўлдошев.
Воқеа гувоҳларининг таъкидлашича, машина текширилганда контрабанда топилмаган. Баҳодир Йўлдошев чегарачилар қуролсиз одамларни қандай отиб ташлаганини кўрганлар борлигини қўшимча қилади. У терговчиларни постда ўрнатилган видеокузатув камераси тасвирларини синчковлик билан ўрганишга чақирган.
Бундан ташқари, қурбонлар қариндошларининг расмийларга бир нечта саволлари бор:
⁉️ «Агар болаларимиз машинасидан ноқонуний олиб кирилган контрабанда топилган бўлса, нега бу ўша куни видеога тушмаган? Мазкур контрабанда товарлари қаерда?
⁉️ Нега улар фақат болаларимиз боши ва юзига қаратиб ўқ узишган? Наҳот ўндан ортиқ чегарачилар уч нафар йигитга бас келишолмаган? Нега улар ҳибсга олинмаган, қўлларига кишан солинмаган ва ички ишлар органларига топширилмаган?
⁉️ Баёнотда айтилишича, у ерда йигитларнинг ўнга яқин шериклари тўпланган. Аммо видеода бор-йўғи тўрт киши кўзга ташланади, бунга нима дейсиз?
⁉️ Нега видеодан болаларимиз қандай отиб ташлангани ҳақидаги парча кесиб ташланган?
⁉️ Агар чегарачилар ҳақ бўлишса, нега видеони тўлиқ эълон қилишмайди?».
Маҳаллий аҳолининг айтишича, сўнгги 5-6 йил ичида улар билан чегарачилар ўртасида кескин муносабатлар кузатилган. Масалан, уларга кўра, ҳарбийлар баъзан маҳалла аҳлининг уйларига рухсатсиз бостириб кириб, шахсий дахлсизликни бузишган.
ℹ️ Фарғона вилоятида икки кишининг ўлими билан боғлиқ воқеа 16 октабрь куни содир бўлган. Ўзбекистон Давлат хавфсизлик хизмати маълумотларига кўра, чегарачилар Қирғизистондан ноқонуний равишда «товар-моддий бойликлари» олиб келаётган фуқароларни аниқлашган. Ҳарбийлар уларни ҳибсга олишга уринган, бироқ маҳаллий аҳоли гумонланувчиларга ёрдамга келишган. Юзага келган жанжал чоғида чегарачилар кучли қаршилик кўрсатган икки кишини ўққа тутишган.
