Сержо Маттарелла ва Шавкат Мирзиёев. Ўзбекистон президенти матбуот хизмати фотосурати
2024 йили Тошкентдаги Турин политехника университетида илғор италян технологиялари трансфери маркази ишга тушади. Европа давлати раҳбарининг Ўзбекистонга расмий ташрифи доирасида бўлиб ўтган икки давлат президентларининг учрашувида таълим соҳасидаги ҳамкорликни давом эттириш масалалари муҳокама қилинди.
Марказий Осиё республикаси раҳбари Шавкат Мирзиёев ва унинг италиялик ҳамкасби Сержо Маттарелла маданий-гуманитар соҳада яна бир қанча лойиҳаларни маълум қилди. Гап Европа давлати ҳудудида қўшма тасвирий санъат кўргазмаларини, шунингдек ҳар икки давлатда маданият, кино ва туризм кунларини ўтказиш ҳақида бормоқда. Бундан ташқари, президентлар самарқандлик мутахассислар, Болонья ва Неаполь университетлари вакиллари ҳамкорликда ишлаётган археологлар жамоаси фаолиятини юқори баҳоладилар.
Мирзиёевнинг «Кўксарой» қароргоҳида бўлиб ўтган музокараларда сиёсатчилар иқтисодий алоқаларни ривожлантиришга алоҳида эътибор қаратди. Таъкидланишича,
Йил бошидан буён Ўзбекистон ва Италия ўртасидаги товар айирбошлаш ҳажми 30 фоизга ошди, қўшма лойиҳалар портфели 9 миллиард еврони ташкил этган.
Икки республика ишбилармонлари металлургия, энергетика, электротехника, қишлоқ хўжалиги ва бошқа соҳаларда фаол ҳамкорлик қилмоқда.
Томонлар ушбу соҳани ривожлантиришга келишиб олдилар, бунинг учун Савдога кўмаклашиш бўйича комплекс дастур ишлаб чиқилади.
Сержо Маттарелла Италия Ўзбекистоннинг Жаҳон савдо ташкилотига аъзо бўлиш жараёнини тезлаштириш ва Европа Иттифоқи билан Кенгайтирилган ҳамкорлик тўғрисидаги битимни қабул қилишни қўллаб-қувватлашга тайёрлигини билдирди.
Бундан ташқари, президентлар минтақавий даражадаги алоқалар муҳимлигини қайд этиб, тегишли форум ўтказишга келишиб олдилар. Тахминларга кўра, бундай тадбирнинг биринчиси келаси йили Самарқандда ўтказилади.
Мирзиёев ва унинг меҳмони парламентлар ва ташқи ишлар вазирликлари, жумладан, «Марказий Осиё – Италия» форматидаги мулоқотни давом эттириш ниятида эканини маълум қилди.
ℹ️ Эслатиб ўтамиз, жорий йилнинг июнь ойида Шавкат Мирзиёев Римга расмий ташриф билан бўлиб, Ўзбекистон президенти ва Италия Бош вазири Жоржио Мелони икки давлат ўртасида стратегик шериклик муносабатларини ўрнатиш тўғрисидаги қўшма декларацияни имзолаган эди.
