Фото t.me/berdsknso54
Бердск шаҳрида (Новосибирск вилояти) яшовчи Қозоғистон фуқароси Украина ҳудудида махсус ҳарбий операцияда иштирок этиш бўйича шартнома имзолаганидан сўнг Россия фуқароси сифатида паспорт олди, деб хабар беради шаҳар маъмурияти ўзининг Telegram-каналида.
«Россия президенти Владимир Путиннинг фармонига мувофиқ, хорижий фуқаролар ҳарбий хизматни ўташ тўғрисида шартнома тузишда соддалаштирилган тартибда Россия фуқаролигини олиш имкониятига эга», — дейилади хабарда. — Новосибирск вилоятида биринчи марта Берчан аҳолиси Павел ва Вероника Конторбаевлар шу тарзда Россия фуқаролигини олишди. Павел Борисович — МҲО иштирокчиси, шартнома бўйича хизмат қилмоқда. Эр-хотинга янги паспортларни Бердск шаҳри ҳокими Роман Бурдин ва шаҳар кенгаши раиси Владимир Голубев тантанали равишда топширишди».
Бердск маъмуриятининг «Ъ-Сибирь» нашрига аниқлик киритишича, хорижликларнинг фуқароликни олиши учун яна иккита шунга ўхшаш ариза ҳозирда кўриб чиқилмоқда.
Май ойи ўрталарида Россия президенти Владимир Путин ҳарбий хизматни ўташ учун шартнома тузган чет эл фуқароларига Россия фуқаролигини соддалаштирилган тартибда олиш имконини берувчи фармонга ўзгартириш киритганди. Россия паспортини олиш учун махсус операцияда иштирок этувчи хорижлик шахс фақат бир йилга шартнома имзолаши лозим. Илгари фуқароликни олиш учун чет элликлар камида беш йил муддатга шартнома тузишлари керак эди.
Қозоғистон ҳукумати аввалроқ Украина ҳудудидаги жанговар ҳаракатларда қатнашаётган республика фуқаролари ўз ватанларида ёлланма жиноят учун жиноий жавобгарликка тортилишини бир неча бор таъкидлаганди. Ўтган йил баҳорида Республика Миллий хавфсизлик қўмитаси томонидан шундай фактлар асосида ўнта жиноят иши тергов қилинган. Ундаги иштирокчилар ҳақида ҳеч қандай маълумот берилмаган.
МҲОда иштирок этиш орқали Россия паспортини олган чет эл фуқаролари ҳақидаги маълумотлар авваллари ҳам маҳаллий оммавий ахборот воситаларида пайдо бўлган эди. Бироқ, одатда бундай хабарларда уларнинг шахсий маълумотлари кўрсатилмаган ва фотосуратда улар юзларини яширишни афзал кўришган.
