Меморандум имзоланиши. Ўзбекистон Экология вазирлиги матбуот хизмати фотосурати
Хитойнинг China CAMC Engineering компанияси Ўзбекистон ҳукумати билан Марказий Осиё республикасида чиқиндиларни ёқиш электр станциясини қуриш бўйича ҳамкорлик меморандумини имзолади. Лойиҳа амалга оширилса, бундай корхона мамлакатимизда биринчи бўлади, деб хабар беради Экология, атроф-муҳитни муҳофаза қилиш ва иқлим ўзгариши вазирлиги матбуот хизмати.
Ҳамкорлик тўғрисидаги ҳужжат 2 май куни Ўзбекистон Экология вазирлиги раҳбари Азиз Абдуҳакимов ва Хитой Халқ Республикасидан компания раҳбари Ван Бо ўртасидаги учрашувда имзоланган.
Музокаралар натижасида маҳаллий бозордаги чиқиндилар билан боғлиқ вазиятни ўрганиш учун яқин кунларда Тошкентга Хитойдан мутахассислар келиши ҳақида келишувга эришилган. Шундан сўнг мутахассислар чиқиндиларни ёқиш заводининг дастлабки лойиҳасини ишлаб чиқишга киришадилар.
Экология вазирлиги қўшимча қилишича, хитойлик ҳамкорлар туризм соҳасидаги ҳамкорлик истиқболларини ҳам кўриб чиқадилар. Жумладан, Самарқанд вилоятининг тоғли ҳудудларида янги осма йўл қуриш имкониятини.
Бундан ташқари, Ўзбекистон расмийлари Хитойдан келган компания вакилларини ҳаво сифатини мониторинг қилиш ва экологик қоидабузарликларга жавоб беришнинг онлайн тизими, шунингдек, чиқиндиларни йиғиш ва ташиш ускуналарини кузатиш тизими фаолияти билан таништирди.
Жорий йилнинг март ойида Ўзбекистон ҳукумати томонидан республиканинг ҳар бир ҳудудида маиший чиқиндиларни қайта ишлаш лойиҳаларини амалга ошириш учун махсус экоиндустриал зоналар ташкил этиш режалари ҳақида хабар берилган эди. Дастлабки маълумотларга кўра, бундай иншоотлар яқин атрофда жойлашган бир неча чиқинди полигонлари гуруҳлари негизида яратилади.
