Антониу Гутерриш ва Ўзбекистон Ташқи ишлар вазири Бахтиёр Саидов. Ўзбекистон ТИВ матбуот хизмати фотосурати
Бирлашган Миллатлар Ташкилоти Бош котиби Антониу Гутерриш 29 июндан 7 июлга қадар Марказий Осиё мамлакатлари бўйлаб сафар қилади. Бу ҳақда БМТ янгиликлар маркази хабар берди.
Беш постсовет давлатининг ҳар бирида Бош котиб президент ва юқори мартабали амалдорлар билан учрашади, шунингдек, иқлим ўзгаришига қарши курашга оид лойиҳалар билан танишади ва маҳаллий фаоллар билан суҳбатлашади.
Биринчи манзил Ўзбекистон бўлди. 30 июнь ва 1 июль кунлари Гутерриш:
👉 Тошкент шаҳридаги «Янги Ўзбекистон» боғида Мустақиллик монументи пойига гул қўйди;
👉 Ҳазрати Имом мажмуасида унга масжид ва мақбаралар тарихи ҳақида сўзлаб берилди;
👉 Ислом цивилизацияси марказида бўлди;
👉 Тошкент вилоятидаги RiverSide қуёш фотоэлектр станциясида бўлди;
👉 Ўзбекистон пойтахти Яккасарой тумани Дилбулок маҳалласига ташриф буюрди.
Кейин Ўзбекистон Президенти Шавкат Мирзиёев билан музокаралар бўлиб ўтди. Музокаралар чоғида глобал ва минтақавий тинчлик, барқарорлик ва изчил тараққиётни таъминлаш, Ўзбекистон ва БМТ ўртасидаги кўп қиррали ҳамкорликни янада кенгайтириш масалалари, Барқарор ривожланиш мақсадларига эришишга қаратилган қўшма лойиҳаларни амалга ошириш ҳолати муҳокама қилинди.
Ўзбекистон ва БМТ ўртасида 140 та қўшма дастур ва лойиҳа муваффақиятли амалга оширилаётгани таъкидланди. Сўнгги йилларда Ўзбекистон ташаббуси билан БМТ Бош Ассамблеяси томонидан 10 та махсус резолюция қабул қилинди.
«Йил бошидан буён БМТ Бош котибининг бешта ўринбосари Ўзбекистонга ташриф буюрди. Ўтган ойда мамлакатимиз Иқтисодий ва ижтимоий кенгаш (ECOSOC) таркибига ва Халқаро меҳнат ташкилотининг Маъмурий кенгашига сайланди. Ўзбекистон вакили биринчи марта БМТ Инсон ҳуқуқлари қўмитаси аъзоси бўлди. Тошкентда БМТнинг яна бир махсус муассасаси – Қишлоқ хўжалигини ривожлантириш бўйича халқаро жамғарманинг ваколатхонаси иш бошлади», — дея эслатади Мирзиёев матбуот хизмати.
Учрашув якунида 2026-2030 йилларда Ўзбекистоннинг Барқарор ривожланиш мақсадлари бўйича БМТ билан ҳамкорликнинг ҳадли дастурини биргаликда ишлаб чиқиш юзасидан келишувга эришилди.
Тошкентдан Гутерриш Қирғизистонга боради. Республика Президенти Садир Жапаров билан музокаралар Чўлпон-Ота шаҳрида бўлиб ўтади.
4 июль куни БМТ Бош котиби Қозоғистон пойтахти Остона шаҳрида бўлиб ўтадиган Шанхай ҳамкорлик ташкилоти (ШҲТ) саммитида иштирок этади.
Саммитнинг мавзуси «Кўп томонлама мулоқотни мустаҳкамлаш – барқарор тинчлик ва тараққиётга интилишдир». Форумда 16 давлат: Қозоғистон, Ҳиндистон, Эрон, Хитой, Қирғизистон, Покистон, Россия, Тожикистон, Ўзбекистон, Беларус, Мўғулистон, Озарбайжон, Қатар, БАА, Туркия ва Туркманистон давлат ва ҳукумат раҳбарлари иштирок этади.
«Гутерриш ўз нутқида саммит иштирокчиларига БМТ Низоми ва Инсон ҳуқуқлари умумжаҳон декларациясига асосланган кўп томонлама тамойилларга содиқлигини яна бир бор тасдиқлаши зарурлигини эслатиб ўтади. У мазкур саъй-ҳаракатларнинг марказида тинчликка интилиш бўлиши кераклигини таъкидлайди», — дейди Бош котибнинг матбуот котиби Стефан Дюжаррик.
Унинг сўзларига кўра, Гутерриш, шунингдек, халқаро ҳамжамиятни геосиёсий тафовутлар умумий таҳдидларни, жумладан, иқлим ўзгаришига қарши курашни самарали ҳал қилишга имкон бермаётганлигидан огоҳлантириш ниятида.
Кейин БМТ Бош котиби Тожикистон ва Туркманистонга ташриф буюради. У 7 июль куни Нью-Йоркка қайтади.
