Видеодан скриншот
Олмаота вилояти полицияси ўсмир Шерзат Болатнинг ўлими бўйича қўлга олинганлар «зиёфат» ўтказгани боис вақтинчалик ҳибсхонани текширади. Бу ҳақда полиция бошқарманинг Телеграм-каналида хабар берилган.
«Вақтинчалик ҳибсхонада қўлга олинганлардан бирининг туғилган куни нишонлаётгани акс этган видеоёзув тарқатилиши юзасидан кенг қамровли тергов олиб борилмоқда», — дейилади хабарда.
Полиция бошқармаси барча айбдорларни, жумладан, муассаса раҳбариятини ҳам қаттиқ жазоланишини маълум қилди. Бу иш бўйича тергов алоҳида назоратга олинган. Ушбу ҳуқуқбузарликни юзага келтирган сабаб ва шарт-шароитларни бартараф этиш чоралари кўрилди, дея таъкидлайди ички ишлар бошқармаси.
Эслатиб ўтамиз, аввалроқ «Президентга мактублар» телеграм-каналида Талгарлик 16 ёшли Шерзат Болат ўлимида гумон қилинаётганлар тергов изоляторида зиёфат уюштиргани акс этган видео пайдо бўлган эди. Улар торт устидаги шамларни пуфлаб ўчиришган, ичимликлар ичишиб, овозли ёрдамчидан Қайрат Нуртас қўшиғини қўйиб беришини сўрашган.
16 ёшли Шерзат Болат 4 октябрга ўтар кечаси оиласига қарашли озиқ-овқат дўкони ёнида ўлдирилган эди. Қариндошларининг сўзларига кўра, жанжал бир банка пиво учун бошланган, харидорлардан бири пул тўлашдан бош тортган. Шерзат ва унинг амакиси ўша кечаси дўкон пештахтаси ортида турган ўсмирнинг отаси Қаржаубай Нуримовни ҳимоя қилишган. Мижоз дўстларини дўконга чақирган, улар ўсмир ва унинг амакисини калтаклашган, Шерзат пичоқ зарбасидан ҳалок бўлган.
12 октябрь, шанбага ўтар кечаси номаълум шахслар Шерзат оиласининг уйига ўт қўйишган, натижада уй ёниб кетган. Ҳеч ким жабрланмаган. Марҳумнинг қариндошлари ҳимояга олинган, Миллий гвардия ходимлари Талгарга патруллик қила бошлаган.
Ўсмир ўлдирилишига алоқадорликда гумон қилинган жами 11 нафар шахс қўлга олинган. Маҳаллий аҳолининг айтишича, жиноятга Ички ишлар вазирлиги томонидан инкор этиб келинган «Хуторские» уюшган жиноий гуруҳ аъзолари ҳам алоқадор бўлиши мумкин.
Қотилликдан икки ой ўтиб, Шерзат амакисининг жасади Талгар чеккасидан топилган. Тергов маълумотларига кўра, у ўз жонига қасд қилган. Унинг дафн маросимида марҳум ўсмирнинг отаси Каржаубай Нуримов ҳибсга олиниб, 15 суткага қамалган. Ўшанда полиция у ўзини тажовузкор тутганини ва бошқаларга таҳдид қилганини маълум қилган. Маҳаллий матбуотнинг ёзишича, дафн маросими пайтида эркак юк машинасига чиқиб олиб, журналистлар билан учрашишни талаб қилган.
Мазкур шов-шувли иш шаҳар ҳокимлиги ва ҳуқуқ-тартибот идоралари раҳбарларидан бир неча мулозимнинг ишдан кетишига сабаб бўлганди.
