ҚР ТИВ матбуот хизмати фотосурати
Қозоғистон Украина билан Каспий қувурлари консорциуми (КҚК) объектига қилинган дронлар ҳужумини муҳокама қилади. Бу ҳақда 19 февраль куни республика Ташқи ишлар вазирлиги расмий вакили Айбек Смадияров маълум қилди, деб хабар беради КазТАГ.
«Бу Қозоғистон иқтисодиёти учун жуда муҳим масала ва биз бу вазиятни украиналик ҳамкорларимиз билан дипломатик каналлар орқали муҳокама қиламиз», — дея мулозим сўзларини келтиради агентлик.
Аввалроқ Қозоғистон Ташқи ишлар вазирининг биринчи ўринбосари Акан Рахметуллин Infomburo.kz нашрига Украина томони билан Остона ёки Киевда алоқа ўрнатиш режалаштирилаётганини маълум қилганди. Унинг сўзларига кўра, келажакда бундай ҳодисалар олдини олиш учун бу масалалар дипломатик йўллар билан ҳал этилиши керак.
Узунлиги 1500 км бўлган КҚК қувурлари тизими Ғарбий Қозоғистон конларини Новороссийскдаги денгиз терминали билан боғлайди ва республика учун нефть экспортининг асосий йўналиши ҳисобланади. 17 феврал куни КҚКнинг Краснодар ўлкасида жойлашган «Кропоткинская» йирик нефть жўнатиш станциясига еттита Украина дронлари ҳужум қилган. Станция жиддий зарар кўрган, фаолиятига путур етказилган.
Россия Тергов қўмитаси ҳужум юзасидан жиноий иш очди. Кейинчалик «Транснефть» (Россия давлат компанияси, КҚК акциядори) станция жиддий шикастлангани, уни қайта тиклаш икки ойгача давом этиши ва таъмирлаш вақтида Қозоғистондан нефть жўнатиш ҳажми 30 фоизга қисқариши мумкинлиги ҳақида хабар берди.
