pnp.ru сайти фотосурати
АҚШ президенти Дональд Трамп 2021 йили Кобул аэропортида содир бўлган терактдаги «бош террорчи» дея тарифлаган Афғонистон фуқароси Муҳаммад Шарифуллоҳ Москва яқинидаги «Крокус Сити Холл» концерт залига ҳужум қилишда айбланганлар билан алоқадорлигини тан олди. ФҚБ ходимлари томонидан ўтказилган сўроқ натижалари Fox News томонидан эълон қилинган.
Шарифуллоҳнинг сўзларига кўра, у «ИШИД-Хуросон»* етакчиларининг биридан Россияда теракт тайёрлаётган жангариларга милтиқ ва бошқа турдаги қуроллардан тўғри фойдаланиш бўйича кўрсатмалар бериш тўғрисида буйруқ олган. Афғонистонлик бир нечта шахсларга тегишли видеоларни юбориш орқали буйруқни бажарган.
Америкалик терговчиларнинг ҳисоботига кўра, Россия ҳукумати «Крокус»га ҳужум қилишда гумонланган тўрт нафар шахсни қўлга олиб, уларнинг юзларини кўрсатганидан сўнг, Шарифуллоҳ ўқотар қуролдан фойдаланиш бўйича ўқув видеолавҳаларини олган икки кишини таниган.
Шарифуллоҳнинг ҳибсга олингани ва кейинчалик АҚШга экстрадиция қилингани 5 март куни маълум бўлди. Янгиликка изоҳ бераркан, президент Дональд Трамп мазкур афғонни 2021 йили Кобул аэропортида 13 америкалик ҳарбий ва камида 170 маҳаллий тинч аҳоли ўлимига сабаб бўлган портлаш ортида турган «бош террорчи» бўлишини айтди.
Оқ уй раҳбари гумонланувчи Покистонда ҳибсга олинганига аниқлик киритиб, мамлакат раҳбариятига «ушбу монстрни қўлга олишда ёрдам бергани учун» миннатдорчилик билдирди.
ℹ️ Қобулдаги теракт 2021 йил 26 август куни содир бўлган. Чет элликлар ва хорижий кучлар билан ҳамкорлик қилган афғонларни тартибсиз эвакуация қилиш чоғида Кобул аэропортининг шарқий дарвозаси яқинида ИШИД*нинг худкуш ҳужумчиси ўзини портлатиб юборган. Бу пайт у ерда юзлаб афғонлар тўпланиб, эвакуация рейсларидан бирига чиқишга ҳаракат қилаётган ва ўнлаб америкалик ҳарбийлар тартибни сақлаб турган бўлган. Бу ҳолат теракт қурбонлари сонининг кўплигини англатади. 2023 йил апрель ойида ушбу ҳужум ташкилотчиси йўқ қилингани ҳақида хабар берилган эди.
ℹ️ 2024 йил 22 март куни Москва вилоятининг Красногорск шаҳридаги «Крокус Сити Холл» концерт залида теракт «Пикник» рок гуруҳи чиқиши олдидан содир бўлганди. Камуфляждаги бир неча қуролланган киши мажмуага кириб, одамларга қарата ўқ ота бошлаган. Улар концерт залига кириб, ўт қўйишган. Ёнғин бинонинг тўрт қавати ва томини қамраб олган, шундан сўнг улар ўзлари келган машинада қочиб кетишган. Теракт 145 кишининг ҳаётига зомин бўлди.
Теракт иши бўйича 27 киши жиноий жавобгарликка тортилган. Жумладан, тўрт нафар ҳужумчи, уларга машина сотган уч киши ва террорчиларга квартирани ижарага берган ёки уларга пул ўтказмаларини юборган одамлар. Ишда 1700 дан ортиқ жабрланувчи ва 800 гувоҳ иштирок этмоқда.
*РФ ва кўпгина давлатларда террорчи сифатидан тан олинган ва тақиқланган ташкилот (Россия қонунчилиги талаби бўйича изоҳлаб ўтамиз).
