IRNA ахборот агентлиги фотосурати
Эрон жанубидаги Бандар Аббос шаҳридаги портда 26 апрель куни содир бўлган портлашда 40 киши ҳалок бўлган. Яна мингга яқин фуқаро жароҳат олган ва уларга тиббий ёрдам кўрсатилмоқда. Қурбонлар ва жароҳатланганлар ҳақидаги янгиланган маълумотларни йирик денгиз порти жойлашган Ҳормозган вилояти маъмурияти тақдим этди, деб хабар беради Irna.ir.
Эрон президенти Масуд Пезешкиан 28 апрелни бутун мамлакат бўйлаб мотам куни деб эълон қилди. Шу билан бирга, Ҳормозганда уч кунлик мотам эълон қилинди. Воқеа жойида терговчилар иш олиб боришмоқда.
Бандар Аббос портида 26 апрель, шанба куни портлаш содир бўлган. Дастлаб бир неча ўнлаб одам ҳалок бўлгани, жароҳатланганлар сони эса қарийб 1200 кишига етгани хабар қилинган эди. Айрим ярадорларнинг аҳволи оғир экани дарҳол маълум бўлган. Ҳозирда расмийлар 40 нафар фуқаронинг ҳалок бўлганини тасдиқлаган, ҳодиса натижасида турли тан жароҳатлари олган мингга яқин киши шифохоналарда қолмоқда.
Қурбонлар сонининг кўплиги портлаш оқибатида порт биноларидан бирининг қулагани билан изоҳланмоқда. Бир қатор ОАВ хабарларига кўра, нефтни қайта ишлаш саноатига тегишли кимёвий омборда ёқилғи баки портлаган. Аммо Эрон нефть ишлаб чиқариш ва тарқатиш миллий компанияси бу хабарларни рад этиб, порт иншоотлари нормал ишлаётганини қўшимча қилган.
Ислом Республикаси расмийлари томонидан илгари сурилган бошқа версияга кўра, портлаш ёнувчи кимёвий материаллар бўлган контейнерлардан биридаги ёнғин натижасида содир бўлган. Шу билан бирга, Ғарб нашрлари фожиага баллистик ракеталарнинг асосий компоненти бўлган натрий перхлоратга нисбатан эҳтиётсизлик муносабатда бўлганлик бўлиши мумкинлигини ёзади. Бироқ, Эрон Мудофаа вазирлиги бу версияни расман рад этиб, уни «дезинформация ва ташвиқот» деб атаган. Вазирликнинг аниқлик киритишича, Бандар Аббосда ҳарбий мақсаддаги юклар сақланмайди.
Ўз навбатида, Ислом Республикаси Олий Оятуллоҳи Али Хоманаий ҳуқуқ-тартибот ва суд идоралари ходимларидан фожиага олиб келган ҳар қандай бепарволик ёки қасддан қилинган ҳаракатларни аниқлаш учун ҳодиса сабабларини чуқур ўрганишни талаб қилган.
Эслатиб ўтамиз, портдаги портлаш муносабати билан кўплаб давлатлар Эрон президентига ҳамдардлик билдирган, шунингдек, жабрланганларнинг тезроқ соғайиб кетишини тилаган. Улар қаторига Марказий Осиёнинг барча постсовет республикалари ҳам киради.
